投票日在即，選戰進入最後埋身肉搏階段，選情緊湊嘅港島區，公民黨、民主黨兩大黨都打開口牌造勢，前者隨時食糊，連取兩席之餘，叫多隻十萬（票）話想食鋪清一色，最新宣傳短片搵埋陳四萬開枱，希望四萬鬆章；民主黨雖然得副爛牌喺手，不過爛有爛做，唔使多，攞多三萬票就夠，希望選民唔好一味投票畀公民黨，留番啲畀民主黨，保住楊森。
公民黨有貴人扶助
公民黨三女將同陳太打麻雀短片噚日公開，有個現實唔會發生嘅戲劇性場面，余大狀摸咗隻十萬食糊，寓意公民黨今次要攞十萬票，為咗達到呢個目標，公民黨開始最後一擊宣傳，喺皇后大道中商廈100QRC掛出巨型橫額。
呢幢商廈業主係地產商羅肇唐家族嘅羅守輝，據講係業主方面主動接觸公民黨借出外牆，雖然其他黨派亦曾聯絡業主，要求在旗下物業張貼海報，但通通被婉拒，呢次可以話係破例，有人指業主可能擔心余若薇落選，所以鋤強扶弱幫幫公民黨。
公民黨有貴人扶助，民主黨卻冇咁好彩，黨內評估，假如公民黨真係可以橫掃10萬票，排第二位嘅楊森固然出局，更隨時連一席都不保，因為勞永樂偷雞可能性不能抹殺。
根據民調及往績，只要有八萬票左右就可以攞到兩席，民主黨估計有約五萬基本票，即係最少要攞多三萬票先保得住楊森，因此近日開始放出攞多三萬票訊息，希望選民收到，否則可能誅死民主黨。
點解攞多三萬票就夠，攞夠四萬唔係仲穩陣咩？據講，呢個問題確係有人思考過，但考慮到陳太最後關頭鬆章畀公民黨，民主黨嗌四萬似乎有點突兀，因此叫三萬就算，免得大家太難做，總之你有你叫糊，我有我做牌，食唔食得出由選民決定。
與其靠人鬆章，不如自摸，民主黨歷年處理無數求助個案，據知已整理出為數達二萬多三萬的手機號碼，投票日會按地區發出短訊，呼籲市民投票畀民主黨候選人，由於呢批人都曾獲民主黨協助，相信係較傾向支持該黨嘅人，催票效果應該高啲，用發短訊方式動員選民，亦補救到民主黨唔夠人手洗樓嘅弱點，當然，咁做同左派有洗樓大軍逐家逐戶拍門冇得比。
mailto:[email protected]