警務處出版嘅《警聲》噚日報道，香港上月誕生咗一位鸚鵡之子。時間係8月23日，凌晨約兩點半，正式係一個風雨交加嘅晚上，水警輪65號接載咗南丫島一名即將臨盆嘅孕婦，全力開往港島。但係水警輪仲未抵達碼頭，呢位風之子已經急不及待，乘風破浪而出，喺水警輪上面呱呱墮地了。
呢單嘢《蘋果》都有報道過，《警聲》就報道多一樣嘢。幫手接生嘅，除咗一名護士之外，仲有警署警長張天賜。張sir可能係警隊中最旺丁嘅警務人員。佢擔任接生工作駕輕就熟，原來遠在1988年，佢仲當緊老散時，已經試過喺冇醫護人員指示下，喺大鴉洲船民營內數次為女船民接生。至於個孕婦，係菲律賓人，同外籍丈夫住喺榕樹灣。