轆Book：<br>五座送細車　七座有頂架　點揀？

轆Book：
五座送細車　七座有頂架　點揀？

要買車真係大把藉口，OK，呢次就擺老婆──個肚上枱，家陣生仔喎，家庭就快添新成員喎，梗要細車換大車啦。不過問題又嚟嘞，CitroenC4Picasso有五座同七座之分，前者送多架細車，後者內櫳比較闊落兼有頂架，咁點揀好呢？

記者：陸伊琳
攝影：林栢鈞
模特兒：Ernest、Annabelle（TheGroup）

場景設定，夫妻二人上枱講數，為乜講數？因為老婆啱啱有喜有身紀，要換車。
老公終於有藉口換新車，又難得老婆都鍾情CitroenC4Picasso。刻下要決定嘅係，究意買五座定七座好？老公鍾情七座，門面說話係：「話唔定生三胞胎，要換就換架大車至得。」實情佢鍾情七人車闊大內櫳。睇資料，七座車身比五座長122mm、高15mm，兩者沿用同一引擎，七座多咗個旅行頂架，望落Young啲，鬼面罩設計亦Sporty啲，最後第三排加多兩張座椅，講真，唔算寬敞但一定唔係Dogseat，有備無患真係生三胞胎嘅話都夠坐，摺起佢，又可以騰出更多空間。避震掂，行車夠穩定，車出車入大肚婆、老人家同小朋友，最緊要係安全。老公咁諗，好有Point喎。

雙倒後鏡夠實用

女人，天生數口精，所以老婆鍾情五座，門面說話係：「一個夠晒數，三胞胎？咪搞我。車，夠用就算。」實情係貪小便宜，五座送多架──車，無吹水，真係車，不過係尾廂裏面嗰架可摺合嘅買餸車。望番內櫳，波棍置於軚環之上，型仔，軚環有齊晒大部份掣，名副其實控制於指掌間，錶板設計跑味十足，邊個話家庭車一定老老土土？雙中置倒後鏡最稱心，一個睇車，一個昅實班嘩鬼，後排冷氣送風口獨立調校溫度，小寶寶可以舒服坐車。老婆咁諗，亦有佢道理啫。
結論係點？結論係五座同七座都各有優點，今晚兩公婆，焗住揳高枕頭有排諗啦。