福和廁紙俾《蘋果》踢爆含菌量爆燈，物流服務署噚日證實，除咗康文署同房屋署公廁，連禮賓府都係用福和廁紙，特首辦廁紙供應商都係福和。醫生話用細菌紙巾隨時中招，有傷口嘅話可能感染發炎，八方記得煲呔曾因肚屙請假，日後「辦大事」時，曾太可以考慮塞兩卷私家廁紙畀煲呔。
有菌廁紙可能連累特首，物流署卻懶懶閒，話已經同福和「磋商」事件。福和噚晚發出聲明，指被驗出有菌嘅樣本，可能受環境污染，而佢哋係按國家衞生紙標準生產，即係每克廁紙要少過600粒細菌，而唔係一次性衞生用品標準，每克廁紙要少過200粒細菌咁高要求。廁紙唔係「一次性衞生用品」，唔通會有人翻用？麥當勞都係用呢個較高標準，《蘋果》驗到福和每克原裝廁紙有3,400粒細菌，就算用國家標準，一樣超標。