擊墜王高清重臨　$78抵炸

擊墜王高清重臨　$78抵炸

今日講嘅《1942》，並唔係揸槍上戰場搏命嗰隻《Battlefield》，而係當年震撼唔少機舖少年心靈嘅縱向射擊名作；經過二十幾年時間洗禮，終於重現大家眼前，啱晒我哋呢班留戀英勇機師榮譽感嘅老鬼。不過，與其話係二十一世紀高清重製版，倒不如用將咁多集優點合而為一嚟形容佢，加埋網上雙打兼夾$78抵玩價，兩個人都可開開心心炸鑊甘！

文：陳福榮

搵外援做風味依然

呢隻《1942：JointStrike》可透過PS3或XB360單撈嚟玩，佢同唔少C記近年重製作品一樣，都係搵外國開發小組操刀，而今次負責嘅Backbone，仲兼顧《高清街霸2》，有睇過試玩片段都知班友仔唔簡單。《1942：JS》支援同機及網上連線雙打，以後想孖埋朋友一齊射餐飽，唔使下下山長水遠走去人哋屋企黐機打。
雖然取名為《1942》，連Logo都似模似樣，但完全變成高清畫面嘅本作其實並唔係原汁原味取自當年原版，而係有齊每集特色在內，似足出奇蛋咁滿足晒所有人願望。除咗標榜主打戰機係幾乎每集都有嘅P-38「閃電」外，佢無乜元素同《1942》有重大關連，皆因佢唔似原版咁一中彈即死，而係似續集《1943》咁設有能量計同「大彈」，玩起嚟隨心所欲好多。再者《1941》嘅地面戰與武器儲勁，以及《19XX》可自由選用機種和勳章獎分制度等都出現番晒喺《1942：JS》度，加埋大家耳熟能詳嘅《1943》經典音樂，成功深化咗遊戲內容，玩起嚟更易令人諗起以往各集。

■雖可選用不同機款，但主角依然係著名嘅P-38。

■受惠於機能強化，敵人數量多如春雨般漫天紛飛。

■機槍貫穿力低但破壞力強，相反激光則適合掃射嘍囉之用。

■巨大爆擊機「散春」，係《19》系列嘅不朽名物。

■左邊戰艦個構造同不停飛出嚟嘅勳章，根本同《19XX》無分別。

■周圍都係麻煩友，搞唔掂想唔放大炸彈清場都唔得。

巨大波士打鑊甘

同好多射擊遊戲一樣，《1942：JS》設有為數不少嘅龐然大物頭目，戰艦、戰機、坦克比比皆是，誇張攻擊模式睇到人眼花撩亂。儘管唔少都係拎番《19XX》嘅資源重新再用，但坦白講空戰場面來來去去都係咁上下啦，唔打呢啲打乜先？至於新增要素方面，當進行雙打時就會無咗原有嘅追蹤導彈，而係變成開局前所選擇嘅合共3款聯合攻擊，其中一款係兩架飛機之間拉條閃電辣人，應用得宜嘅話普通嘍囉都唔係你手腳。

■呢隻空中堡壘似曾相識，分別在於攻擊點多咗好多。

■打到咁上下仲識得掉番轉頭嚟撞你，快啲閃開啦！

■坦克要塞又係識得旋轉噴火，要吼準機會狂射佢核心。

■為襯托巨大敵機體積，畫面都自動放大增加壓迫感。

小知識：《19》系列歷久不衰

即使《19》系列喺唔同機種出過無數次，印象中好似成日翻出咁，其實喺24年前亦即1984年面世嘅《1942》，其後僅推出過5隻延續篇，最後嗰集已經係搵其他人代工、千禧年面世嘅《1944TheLoopMaster》。講番系列頭炮《1942》，因為佢足足有32關難度亦高，加上設有幾獨特嘅輔助機同360O翻身救命系統，幫C廠成功賺取第一桶金。基於無乜大佬打兼一撞即死，機迷以外嘅人唔少都對佢敬而遠之，開發人員於是喺87年嘅續集《1943》大刀闊斧，引入多款新穎武器同最重要嘅能量設定，做旺個市吸納更多新客捧場，成功締造射擊遊戲嘅黃金年代。不過大家千祈咪搞錯，個名似層層嘅《Striker1945》其實並非出自C廠之手，兩個系列玩法上亦顯著分別，話佢係臨摹者比較貼切。

■原版《1942》系統相當簡單，想打爆機好講求玩家嘅忍耐力。

■《1943》唔止確立咗系列嘅發展藍圖，仲影響到其他射擊遊戲。

《1942：JointStrike》

遊戲類型：縱向射擊
對應機種：PS3、XB360
遊玩人數：1-2人（支援Online合作）
開發商：CAPCOM
售價：約$80