姑婆者，終身不嫁也。到今日更衍生「嫁唔出」的含意，所以女人最忌俾人叫老姑婆，但最近有班年輕人竟然仲大叫要「嫁入姑婆屋」，仲廣邀觀眾出席他們的housewarmingparty，到底葫蘆裏面賣甚麼藥？何不直搗話劇《嫁入姑婆屋》編劇現實中的家，睇吓何謂現代姑婆屋，革命從何而生！
記者︰黃家欣
攝影︰譚盈傑
結婚不是唯一出路
姑婆即自梳女，根據網上維基百科記載︰「自梳指女性把頭髮像已婚婦一樣自行盤起，以示獨身終老，自梳後的女人被稱為自梳女，也稱媽姐或姑婆，死後稱淨女，是古代中國女性文化的一種。」古時自梳的儀式同結婚一樣複雜，而且是個終身承諾，絕非兒戲。咁現代姑婆又係甚麼一回事，《嫁》劇其中一個導演閃閃說︰「我哋並唔係要終生不嫁，亦都唔係叫人唔好結婚，一般父母和社會認為我哋要有個穩定將來，結婚生仔係必然的事，不過我哋就覺得結婚不是唯一出路。身邊有已婚朋友未必過得好，但單身的也多的是，沒有甚麼大不了。」編劇Rose補充︰「我哋覺得以前的姑婆係好革命性，因為當時社會的婚姻制度係牢不可破，而姑婆就係要反抗呢個觀念，脫離呢個制度。就好似我哋父母、家人總為將來有穩定的settlement，結婚、生仔、有車、有樓就係好，而我哋係想擺脫呢個思想，人生其實還有好多選擇，做自己喜歡的事，比一個穩定的將來更重要。」呢種革命性，就是他們自覺與姑婆的共通點。
真實版只有姑婆房
古時的姑婆其實幾悲劇，以為逃出了婚姻制度，卻原來是套上另一個枷鎖，姑婆被迫要脫離家庭，甚至死後父母、家人也不能為其安葬，所以她們就自己出錢起姑婆屋，住埋一齊互相照顧，解決生養死葬的問題。現代的姑婆屋則來得逍遙得多，閃閃回應道︰「我們的『姑婆』係好positive，而姑婆屋亦非一個永久的settlement，只是人生當中的一個中轉站。劇中一班朋友，就因為有共同目標，而決定一齊搬出來住，到後來在姑婆屋經歷一啲事，隨住年齡的長大，最後發現大家理想各有不同，結局就係大家離開姑婆屋，各自走向自己的理想。」咦，咁似曾相識，咁《六樓後座》嘅？《嫁》劇的姑婆屋是間位處於大澳的棚屋，隔涉的位置正好反映他們要脫離主流。回到現實，香港樓價高企，各人即使想脫離家庭自組姑婆屋也苦無資金，加上各人也要照顧父母，於是只好「屈就」家中，由姑婆屋縮水至姑婆房。其中一個演員Vance說︰「匿喺間房做自己嘢，放滿自己鍾意的東西，都可以係一個完全屬於自己的空間。」原本要求到各人的姑婆屋探秘，可惜礙於各人的家人反對，最後只得編劇Rose的家向我們開放。原本想像姑婆屋應該好亂，Rose間房雖然好多嘢，但亦算井井有條，自稱是「似男人的女人」，房裏最多就係書和影碟，僅有幾隻公仔都係朋友送，而大熊人公仔則是暫放她家的《嫁》劇道具，其餘陳設的確幾man，「姑婆房」內除了實行高度自治之外，其實也與一般家居無異。
非獨身宣言
幾位「姑婆」聲稱並不抗拒婚姻，但無時無刻都要free，是否導致劇組大部份人均是單身的主因？各人都認為揀伴侶就一定要認同、了解他們的想法，而Rose就曾經因為理想放棄感情，「當時覺得時間唔夠用，又要追求事業同興趣，又要有自己的私人空間，加上當時拍拖的priority放得唔高，覺得自己做唔到一個稱職的女朋友，所以便分手了。」當時因為追求自由、理想而選擇單身，但過咗一段時間，Rose這刻又想談一場轟轟烈烈的戀愛，「因為𠵱家想將戀愛的priority放高點，遇到啱channel、夾的人，都想再拍拖。」大抵這就是與古時的最大不同，當時的姑婆要緊守貞節牌坊，稍有行為不檢都要浸豬籠，現代社會當然大不同。
Vance，27歲，單身。原本是慈善機構的項目幹事，完成《嫁》劇後會離港一段時間，她說不會不照顧父母，但有時也想脫離屋企一排。
Rose，28歲，單身，從事marketing工作。與Joe等幾個識於微時的朋友，經常說笑要買間姑婆屋搬出來住。
《嫁》劇演員阿Ling，年齡20+，單身，中學教師。她說︰「追尋理想不代表對家庭不負責，屋企主要靠我供養，經濟不算鬆裕，但我都會堅持做話劇。」
樂做男姑婆
現代老姑婆並非不婚主義，甚至乎連男人都要嫁入姑婆屋。劇中由五人組成的姑婆屋內，其中兩人就是男生，Joe是其一。到底男人老狗為乜要做姑婆？「我的角色阿信是個性格依賴的人，因為在家唔開心，便入住姑婆屋依賴一班朋友生活。」現實中經濟系畢業的Joe，外人都期望他應該找金融、保險的工作，「但我覺得可以有其他wayout，我𠵱家做空中服務員，好似無乜careerpath，人工亦唔多，我呢個moment唔想將自己定型，想做自己鍾意做的事。」屋企人有冇微言？「就算無咗我份3、4千蚊的家用，屋企都未至於無飯開，而且香港係唔會餓死人的﹗」此時大家一哄而上，「係呀，就算攞綜援都可以有理想。」已經辭了工，打算去外國生活一排的Vance說︰「其實我哋屋企唔係好有錢，都要取捨，畀家用之餘，再做自己的理想，可以話係一種『窮風流』。」這是叫少年不識愁滋味？他們這班有春青、有學歷、又有家人support，要「窮風流」也未免太謙虛，至於香港餓唔死人，睇嚟無綫都要再加把勁製作寫實點的《一百萬人的故事》。
Joe，26歲，單身。剛從廣告界轉職空中服務員，目前很enjoy，未打算settledown，樂於做男姑婆。
《嫁入姑婆屋》
一班來自中文大學崇基劇社的畢業生，閒聊之下產生自組姑婆屋的念頭，決定將現實中未能實現的理想先搬上舞台。藉着「姑婆屋」講一班年輕人不甘人生只為一個平凡穩定的將來而努力，認為可以有更多的可能，而透過姑婆屋，各人由初時的懵懂迷惘，漸漸找到自己的目標，《嫁》劇開始前更有一個小型的housewarmingparty，劇組呼籲觀眾們帶備酒水前來﹗
日期︰9月6至7日
地點︰沙田大會堂文娛廳
時間︰8pm
票價︰$100（不設劃位）
查詢︰60142669（譚小姐）
