今夏轉會市場終於在9月1日關閉，各支英超球隊有得有失，獵得心頭好當然開心，臨門「撻Q」自然一肚火，加深結怨，經過國際賽賽期後，9月的英超立即大戰連場，肯定打得更為燦爛。文：牽牛
13/09 利物浦主對曼聯
上季合共為熱刺射入30球的前鋒組合羅比堅尼及貝碧托夫，今季竟齊齊離開白鹿徑；9月13日，由羅比堅尼領軍的利物浦，就主場對料首度為曼聯披甲上陣的貝碧托夫。
3/09 曼城主對車路士
曼城臨門搶走羅賓奴，一心以為打友情牌可以購入愛將的車路士巴西籍領隊史高拉利冇晒面，14日領軍作客曼城，唔贏波都要麾下球員好好「招呼」羅賓奴。
15/09 熱刺主對阿士東維拉
睇過歐國盃決賽周表現，點都唔明柏夫里約真高點值1,400萬鎊，15日佢會首披熱刺戰衣，主場對大勇的阿士東維拉，睇吓呢位俄羅斯前鋒頂唔頂得贏維拉中堅拿臣嘞！
21/09 車路士主對曼聯
上季英超冠亞軍交手，一向做慣大豪客嘅車路士，出奇地今夏轉會甚低調，曼聯就終於獵得貝碧托夫，增加衞冕籌碼，不過曼城突然變身，車曼戰仲係唔係冠軍大戰呢？
本月英超矚目大戰
13/09：利物浦主對曼聯、布力般流浪主對阿仙奴、曼城主對車路士
15/09：熱刺主對阿士東維拉
20/09：新特蘭主對米杜士堡
21/09：車路士主對曼聯、曼城主對樸茨茅夫
27/09：愛華頓主對利物浦、曼聯主對保頓
註：比賽日期為英國時間