國泰航空向長期告病假之機艙服務員索取病歷，被私隱專員頒令阻止，國泰不服，向高院申請司法覆核，法官判國泰勝訴，私隱專員吳斌律師話要慎重考慮是否上訴。
左丁山認為，經常告病假，長期告病假者，必然有一個理由，譬如有隱疾，或者身體太弱，甚至患上不穩定情緒病，以至偷懶等等。僱主對常告病假者有懷疑，有其合理性。僱主有好有壞，僱員有勤力有蛇王，不可一概而論，斷冇話凡係工人員工就啱晒，老闆一定錯晒嘅。左丁山見過聽過唔少打工仔蛇王故事，而且多數係大機構僱員㖭。中小企僱員一舉一動，易給老闆觀察到，難以說謊，蛇王情況反為少一啲。大機構呢？公事公辦，人力資源部同事唔會過份挑剔其他部門同事嘅，總之得過且過。小記者Ｃ有同學做咗某航空公司空姐，入行冇耐，向小Ｃ訴苦，話有一啲老經驗嘅大姐姐獲派上紐約、倫敦、多倫多航綫，就鬼打冇咁精神，派上台北、上海等短程航綫就會告病假。原來飛長途有多啲津貼，增加收入，飛短途就只得份正常人工。於是小Ｃ嘅同學就成日在短途機替補「病人」囉。好彩呢啲大阿姐只係極少數，但新人看在眼裏，難保他日不會仿效。
分析Ｂ在大機構工作，佢有同事每個月告足兩日病假，十年如是，總之話唔好蝕底俾公司咁講，佢嘅上司知道都冇符。老闆萬事德更多呢類小故事，佢不止一次同左丁山講，一啲司機詐有工傷，告長期病假，實則走去做日更的士司機，佢夠好想向呢啲人索取病歷啦，但驚住俾私隱專員控告而已，𠵱家好咯，國泰為佢哋中小企出頭，萬事德可以考慮學習。
其實真金不怕洪爐火，真係有長期病，唔係偷懶蛇王嘅話，使乜怕話俾公司知道吖，如果大公司用患病理由炒職員魷魚，唔怕僱員告上勞工處及法庭打官司咩！航空公司更加須要知道經常告病假嘅機艙服務員有無傳染病、精神病等病歷，以保障乘客安全。吳斌專員請唔好浪費納稅人金錢嘞，放棄上訴啦。