網誌日期：2008-09-02
上年尾先去過倫敦捧阿仙奴場，當時滙價係1鎊兌15.7港元左右；事隔9個月，全球經濟大震盪，諗住長供嘅乜基金物基金大縮水，經紀黃都少咗搵我，英鎊也貶值，跌至換14蚊港幣左右。如果𠵱家去買件新嘅阿仙奴波衫，差唔多打個八五折，真係心都郁埋。
唔知係咪英鎊平咗，英超掃貨都好疏爽。上年尾親眼睇過貝碧托夫呢位歐洲射手喺場上嘅秀麗腳法同射術，但下年1月夠28歲，個價值唔值，不如問吓紅魔躉；小弟認為一個球星附上天王級價錢，必定要有隨時扭轉局勢嘅能力，好似利記嘅謝拉特。
如果用呢個準則，我認為，年輕3年嘅羅賓奴可塑性更高更抵。皇馬兩連霸，羅賓奴功不可沒，任翼鋒爆發力強入球量多；但以曉士這類傳統英式領隊，可打4-4-2，羅賓奴與同鄉中鋒祖奧打雙箭頭；曼城今季實不可輕視，我想入前4機會起碼比熱刺高一點。
費蘭尼投愛華頓，為比利時足球攞威。
周中巴甲主打，留意足智彩專家畀料。
阿仙奴終於冇買人，又估唔到雲格。
蘋果波神個人資料
睇足球如學做人，所以我永遠放在重要位置。
（逢周一至周五見報）
http://hk.myblog.yahoo.com/appleballmen/