近排中環最多人講仍然係股神畢菲特究竟睇中邊隻大陸股，好多人一口咬定係大陸銀行股，咁睇嚟，大陸銀行應該好有景！不過，有前景還有前景，噚日外電引述兩位消息人士講，中國民生銀行行長王浵世會喺今年退休，佢嘅職位會由現任副行長洪崎接替。據講民生董事長董文標已原則上同意王浵世退休，家陣只係等董事局批准。
副行長洪崎接替
王浵世喺06年加入民生銀行做行長，之前佢喺滙豐打工超過30年，由香港希慎道分行經理，升到獅子行中國業務總裁，之後又調到海外做美國西部總裁。05年離開獅子行，王浵世曾經喺間叫聚龍企業（中國）做過一年CEO。
傳聞今次接替王浵世行長一職嘅洪崎，曾經做過人行總研究助理研究員、人民大學證券研究所副所長，交行北海分行行長，喺內地金融圈都打滾咗廿幾年。洪崎喺95年加入民生，做北京管理部總經理，到00年升任為副行長，再做埋執董，家陣佢再上一層樓，有機會升做行長㖭。