奧運開幕式播完又播，大家仍樂此不疲，不自覺眼都唔眨昅實電視，無計，就憑張藝謀精心策劃嘅歌舞昇平，香港人好似突然間搵番條根，紛紛認祖歸宗，民族自尊心返晒嚟。張大導以「四大發明」為主題，晒人多錢多，淨係一開場二千個壯漢擊缶嘅場面，已令人目瞪口呆，搞到主辦下屆奧運嘅倫敦手騰腳震，話一切從簡。加埋合作無間的武指程小東，指導李寧凌空側身漫步點聖火，視覺效果震撼過《臥虎藏龍》。
開幕式完咗幾日，DVD已經喺大陸賣通街，呢隻正貨國產版由中央台拍攝剪輯，百分百原汁原味，一直賣斷市，香港碟舖老闆話剛剛第四輪返貨，要買趁手；以前家家一本毛語錄，我話𠵱家最緊要人人一隻奧運開幕式DVD，唔係點認係中國人！
記者：吳允冲