一項網上調查發現，網友最想劉華當選，唔係民建聯個A貨劉華，係真正個劉德華。調查由新浪網進行，有千幾個網友投票，太平紳士劉德華得票率達27%，最多人想佢做議員，第二位係發哥，得21%票。
候選人最愛認叻，標榜自己為民服務政績無數，如果阿叻參選，真係大把機會俾佢認叻，有兩成人投票話最想佢做議員；志雲大師都有8.5%支持率，網友讚佢把聲夠靚，聽佢講嘢就算係廢話，都可能冇咁難受。
香港政壇一池死水，有7.6%人想星爺入立法會，其實煲呔講嘢，好似話視民意如浮雲都好爆笑，星爺當選真係棋逢敵手；令人意外係狄龍都上榜，半成人最想佢從政，指佢有大俠feel，可以幫小市民伸張正義。