內地電器連鎖集團兩大巨頭──國美電器（493）黃光裕同蘇寧電器張近東，一向都鬥得好激烈，今年上半年首回合，張近東先勝一局──蘇寧上半年營業額大增38%，去到259億人仔，比國美同期升18%，得249億人仔營業額，高4%。
張近東今次贏出，全靠夠大。原來做零售生意唔係話分店多，就一定surewin，最緊要講銷售策略。據新浪網報道，比較蘇寧國美兩間公司年報，蘇寧嘅分店數目只有726間，比起國美嘅828間分店，少102間，但蘇寧上半年營業額多過國美10億銀，營業額增長幅度更大得多，反映國美過往透過「收購整合」發展壯大嘅模式受到嚴峻考驗。
蘇寧總裁孫為民解釋，佢哋嘅零售策略着重「自主開店」，兼且好重視店舖面積、設計同開舖地點，雖然蘇寧嘅分店唔及國美咁多，但平均分店面積達4245平方米，較國美嘅平均3575平方米，高出近700平方米。蘇寧分店咁大，顧客買嘢唔使咁迫，使錢都使得疏爽啲啦。