眾所周知，Audi不嬲以RS車系性能最強，繼舊年推出RS6Avant後，今年終於輪到RS6房車聯同A6同步登場。
我幾Like新車一對電眼，眼仔睩睩離九丈遠都望得到，行出街兜個Round，一定搶到收視。一如全新A4、A5咁，頭燈入面加入LED日光燈，撻着閃閃令光燦燦，想像到呢對電眼魅力有幾強勁嘞啩？大大個鬼面罩佔據車頭，上面整多四個圓圈，隱隱散發跑味。貴為性能房車，買嗰個有要求，得個殼絕對唔夠，RS6配置5.0公升V10FSI引擎，加埋兩個渦輪增壓系統輔助，搭配六前速Tiptronic、Quattro四驅系統，馬力輸出高達580匹，扭力66.3kgm，齋睇數字都知中看又中用。獨特尾燈都好搶眼啫，承接新一代設計元素，紅襯白，條狀白燈置於多邊菱形LED燈組之間，線條簡單唔老土，個Look夠晒潮，都係要讚。
記者：梁美甜