內地股上周連續回升兩日，昨日又重拾跌勢，挫逾3%。有傳內地會有救巿措施，但就未見到實際行動。不過嘉賓認為9月中起內地股巿將會回穩，市況並會於10月更加明朗化，所以投資者不宜過份悲觀。
孫：主持孫柏文
康：灝天證券研究部主管兼零售證券部總裁黃偉康
孫：上個禮拜A股反彈過一陣，因為傳可能會有救巿措施出台，但除咗話賣大小非要收暴利稅外，都冇其他救巿措施喎。
康：中國喺10月份會開十七大三中全會，但通常喺大型會議之前好少會話落實任何措施。巿場有憧憬其實因為7月胡錦濤主席喺人大常委會議，話想為10月三中全會定調，打算吓下半年經濟方向點行。所以好多人都諗住10月會有定案，但到真正落實時大家又唔好太大期望，覺得10月前會落實到。但10月份應該會有好多實際消息出嚟。有啲消息靈通嘅人，去到月底可能唔會沽，甚至會開始買嘢，所以9月中個股巿應該會穩定番，10月更加會明朗化。但喺呢兩個禮拜唔好抱住太大希望，甚至可能會有人借勢踩多兩腳，港股喺9月中前應該會徘徊20500至21500點。9月中後就不妨憧憬多少少。
上星期買咗港交所（388）put輪（6666），今日正股跌，佢都跌呀！
港交所價跌put不升
康：呢隻輪係100換1，即係正股如果跌１蚊，隻輪就升１仙，所以要升2仙的話，正股就要跌到98蚊，繼唔繼續持有，隻輪會唔會升，就要睇你有無信心月底正股會唔會跌到90蚊喇。下次你再買輪最好睇清楚條款喇，如果你買嘅港交所put輪行使價係100蚊，今日就會跟升喇。
余師奶：我下次乜都唔買喇！
思捷環球（330）今日（周一）跌到61.1蚊，應該點做？有冇機上番67至68蚊？
思捷65蚊要散水
康：呢間公司前景真係令人擔憂，85%營業額嚟自歐洲。而全球經濟早前擔心完美國𠵱家又去到歐洲，所以未來業績真係好令人憂慮。另外佢早前業績都係受惠歐元強勢，但係歐元已經累跌咗10%。滙兌同埋歐洲經濟嘅影響，有可能令到呢隻股份有倒退，基金就可能會進行洗倉。但佢股價累跌咗咁多，去到60蚊都有些小反彈，又有超賣迹象，所以你都可以等佢反彈，先至沽出。暫時第一個阻力位喺65蚊，如果穿唔到65蚊或者穿咗企唔穩，你就要沽出蝕少當贏。
我睇好中石油（857），所以買咗佢CALL輪（6548），我見佢沽壓唔大，短炒睇正股上返10.5蚊。
中石油波幅細損call輪
康：我覺得你要小心啲，因為佢A股股價的確係創新低，但係佢AH股價之間有溢價，相反其他大價股份AH股之間差價已經好貼近，所以可能中石油A跌而H股唔跌，趁機拉近差價；另外你揀嘅呢隻輪我都有顧慮，因為近排中石油波幅收窄咗，所以就算中石油股價升，輪價格都未必可以跟得好貼，除非中石油短期有好大上升幅度，否則時間值損耗都可能會幾嚴重。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股
