呢日飲完茶，行經中環三聯書店，心念一動，走落去睇吓有乜新書出版。當眼處，有一本《香港足球誌》，為之眼前一亮，因為左丁山係標準球迷，對本地足球史好有興趣，即刻拿書一看，作者係莫逸風、黃海榮，皆嶺南大學文化研究碩士，書背仲有呂大樂讚幾句㖭。本想立即買下，但忍唔住要睇番幾頁先，睇過就失望咯，此書由張子岱講起，張子岱之前嘅姚卓然、莫振華、何祥友時代完全冇提，當然亦冇一九五八年東京亞運，中華民國足球隊由十幾個香港球員代表，勇奪金牌之故事，如此《香港足球誌》，點算完整呀，於是放低唔買。
記得京奧期間，《大公報》有整版報導，講一位唔識中文嘅英國人，留港工作之時，因行山而認識幾位大坑街坊，得悉一九三六年柏林奧運，中華民國足球隊力戰之下，輸畀英國隊○比二，而所有骨幹球員皆是大坑子弟兵，呢位英國人於是花咗好幾年工夫，搜集資料，猛咁搵譚詠麟（譚校長反應冷淡）攞番一啲銅頭譚江柏（譚校長之父）嘅料，卒之憑大坑有心人之幫助寫成一本書，記述一九三六大坑子弟兵。呢位英國人認真夠勤力，寫信去德國柏林索取一九三六年之奧運官方資料，為香港足球史最輝煌的一頁留下一段歷史。相形之下，當今之年青香港人寫足球誌，未免取易不取難，講香港足球而不記述上世紀五十年代之南巴大戰，差少少喎。
一九三六之中國奧運足球隊，遠勝七十二年後之中國奧運足球隊。今年之「國足」既輸波，又打人，失禮全世界，隊員李偉峯事後對記者講：「我哋踢足球似係巴西人打乒乓波。」自以為幽默，點知立即引起巴西乒乓隊教練（中國人）抗議，呢位教練話：「巴西乒乓隊係南美洲嘅勁旅。」咁講法，係人都知佢係諷刺中國足球係亞球弱旅，因為國足輸畀伊拉克，卡塔爾見到南韓與日本就腳軟也。中國足球係京奧大笑話，中國網民以至《人民日報》及新華社都一齊痛批，但中宣部上星期突然發出通知，傳媒唔准再批評中國足球隊。鬧吓都唔得？驚會產生政治問題喎！咁怕死，中國足球冇得救！