咪以為功能組別候選人腳印印，唔使好似直選候選人咁落力拉票，參選批發及零售界嘅自由黨方剛，雖然被人睇高一線，但原來都要「晨」出鬼沒咁拉票，天蒙光5點鐘已經現身長沙灣魚市場或者油麻地果欄，同佢嘅業界選民講早晨兼多多支持，據聞好多界內人士見到方剛真人都嚇一跳，估唔到佢咁早落去探班。
其實今屆唔係方剛首次參選，理論上可以輕鬆啲，偏偏金勞詹支持假髮大王趙振國撼佢，加上趙振國早前直認種咗2,000票，方剛自然不容有失。佢話除咗落果欄同魚市場晨操，仲會去唔同行業嘅小商戶度拉票，希望用一對腳，拉多過2,000票返嚟，要贏人先要贏自己咁喎。