選舉指引列明唔可以向選民提供飲食，但如果啲飲食只係「做假」，當然冇問題。民建聯新西團隊噚日為選舉開咗間民記小廚，身為小廚董事長嘅譚耀宗檢視民記業績，自誇民記都整咗幾味燃手小菜，例如「炒雜稅」炒走咗外傭稅同地稅，「招牌雙丸」就成功推出咗復售居屋同重建公屋，總之食到大家lamlam脷。
乘勢反擊抹黑新聞
不過，身為二廚嘅張學明大嘆生意難做，因為新西嘅小廚越開越多，佢哋未必會繼續爭到兩席，所以噚日專誠炮製咗一客「鬆糕加喼汁」，客家話讀起嚟即係「糕（告）喼（急）」，俾大家嘆，呼籲選民多多支持。
好多人指控民記派月餅拉票，噚日佢哋索性推出「大月餅」贈興，提早同市民慶中秋，順手祝大家家好月圓。不過呢個月餅有得睇冇得食，係假嘢一個，譚耀宗乘勢反擊，話佢哋派月餅嘅新聞都係假嘅；如果近日仲有啲抹黑新聞出爐，唔會繼續食死貓，諮詢法律意見後，唔排除會採取行動喎。