R306變FM轟炸機<br>同馬迷鬥嗌

R306變FM轟炸機
同馬迷鬥嗌

愛玩馬仔嘅人經常抱怨：「如果中埋呢場就發喇！」又或者：「又輸個馬鼻！」咪發夢住，所謂工欲善其事，必先利其器，玩馬仔除咗講獨到眼光，最快及最清晰嘅資訊內容亦非常重要！呢期SonyEricsson推出超平FM手機R306，外形勁潮兼喇叭特別大聲，踎喺馬會門口幫心水馬打氣，勁有氣勢！

記者：陳國輝
攝影：王文忠
Model：Eric@pure

「收音機都係賣點？好多手機都有啦！」冇錯，內置FM頻道的確唔係新鮮事，不過R306既屬於SE全新系列，亦係首部將該功能設於機面嘅電話，因此仍然有賣點！傳統FM模式好煩，要逐個Step將功能啓動，而且追台勁慢，好嘥時間；相比R306將所有FM分唇移到機身特設嘅3粒電台鍵，平時聽慣邊類節目，喺機面㩒一下就得，方便好多！
追台速度亦值得讚，用家只要按動左邊上下掣，手機會自動追台，每搜尋一條頻道約3秒時間，仲快過你入Menu慢慢揀啦！不過咁，R306最唔妥係冇選用內置天線，仍然靠插住隻Handsfree嚟追台，拖住個耳筒始終唔夠瀟灑囉！

■咪俾收音機正面呃咗，查實係一部摺機先真！

■白色機好易沾上報紙油墨。

■按FM專用掣即可揀選心愛電台。

機身加擴音超好炸

用落的確方便，不過好多收音機都有樣死症，就係接收得唔清楚！筆者試過喺搭車時及旺角街頭試聽，全程竟甚少聲沙或接收不良問題；更抵讚係R306並非只為個人而設，機身兩邊各有一隻喇叭，最厲害係特設「嗌聲」功能，音量比正常時大一倍！賽馬日哺喺馬會門口聽馬仔，肯定揮低晒隔籬嗰堆馬迷。
不過要提一提大家，如果你習慣單手拎住份馬經，一邊收聽FM，建議你唔好揀白色機身，因為報紙油墨大多易甩，唔覺意就會搞到部手機污糟難睇，但假如你本身都鍾意黑色機，咁當然冇問題啦！