昨日港股全日總成交縮至411億，如此成交，反映唔少投資者已經撤離股票市場，拒絕再玩。跌市股票無鑊氣係成交低的一個理由，另一個理由，好可能係市場已經無路可捉，一些業績佳的股票，亦唔見得有資金追捧，叫人如何入市？
好似剛公佈中期佳績的中國中鐵（390），上半年純利19.06億元人民幣，較上年同期增190%，期內營業收入930億元人民幣，同比增26.6%。上半年中國中鐵共計新簽合同額1798億元人民幣，與去年同期比較，增長119%，其中包括京滬高速鐵路、滬寧城際鐵路、綿遂高速、上海軌道交通等多個重大項目。
有此佳績，中鐵股價仍在高開6.20元後全日向下，收市要輕微倒跌。中鐵令人失望之處，是今年以來股價已勁跌43%，幾乎連僅有之反彈亦都無力，公佈佳績後亦只有咁嘅表現，看來是回升乏力。
特步績優有得諗
今年以來股價算係硬淨嘅華潤電力（836），中午公佈業績後亦要跌，午前股價仍有20元，收市已跌至19.14元。集團上半年實現淨利潤10.06億元港元，雖比上年同期倒退28.7%，但已較其他中資電力股半年虧損情況好得多，結果投資者反應也是先沽為快。
昨日中期業績最有驚喜的股票，要數上市僅3個月的體育用品股特步國際（1368），該公司截至今年6月底止半年純利2.55億元人民幣，上升2.1倍，每股盈利16.01分人民幣，派中期息每股5港仙。若特步全年賺5億元人民幣，現價PE不足10倍，且可收高息，應該係唔錯嘅投資，只不過遇上熊市，好股票也未必一定會升。