京奧曲終人散，但仍然有唔少人好回味，中銀信用卡總經理蘇誠信噚日出席崇光Visa白金卡發卡儀式後，同人傾嘅話題，亦離唔開奧運，呢啲唔知算唔算係奧運後遺症？
蘇誠信同華華講，奧運期間好忙，冇時間上京睇開幕同比賽，但都有入場睇奧馬，至於其他比賽，蘇誠信就只有睇電視轉播。不過，佢應該唔係經常睇無記，話說噚日活動嘅司儀係前港姐冠軍楊婉儀，蘇誠信竟然問對方有冇睇奧運。若然佢有睇無記，應該知道楊小姐有份主持奧運節目。
讚央視仔細易明
不過，當佢同無記個記者傾偈時，又忍唔住話對方個台嘅奧馬轉播做得冇人哋咁好，咁邊個「人哋」呢？佢話，睇央視CCTV用卡通講解馬術比賽點玩法，好仔細又易明，反而負責馬術比賽場地嘅香港，啲電視台做唔到。唔知蘇誠信見到楊婉儀後，會唔會叫佢同無綫反映吓，提高吓電視節目質素呢？