唔知大家有冇跟開呢單新聞，早排祖雲達斯會長基利好搞笑，被困喺球會更衣室嘅廁所一粒鐘，初時都以為佢老人家論盡反鎖咗自己喺入面，點知原來係隊員堤亞高文廸斯搞鬼！呢位葡萄牙中場不滿球隊想賣走佢，竟然鎖會長喺廁所都做得出，好彩隊長「金童」廸比亞路聽到基利嗌救命，否則可能要瞓屎塔！
被反鎖廁所幸金童打救
今夏轉會市場入面，我求大俠只係聽過球員想離隊他投，先會想盡一切辦法令球會討厭佢哋。好似辛尼特嘅艾沙維咁，季初就試過罷踢博轉會巴塞或熱刺；又如皇馬嘅羅賓奴，喺記者會上講明唔想留低，招數真係層出不窮。
今次堤亞高文廸斯啱啱相反，就係唔想離隊所以連會長都搞。基利周一發表聲明，佢話：「我被困廁所單嘢係堅嘅，係堤亞高文廸斯做嘅都係堅嘅！」聽講當時基利喺廁所入面不停求救，係咁大力勁拍度門，好彩咁啱廸比亞路經過聽到有人嗌救命，於是就整爛度門救咗基利出嚟。
堤亞高文廸斯今次搞單大鑊嘢出嚟，無非係不滿球會想將佢賣至愛華頓或者摩納哥，原因係冇得踢歐聯之外，堤亞高文廸斯都唔想離開祖記，於是計劃呢個向會長復仇行動。聽講教練雲尼亞里嘅組軍方針，一早預咗個位畀堤亞高文廸斯；不過今次事件過後，球會發言人就話：「原本佢有機會留隊嘅，𠵱家？希望盡快幫佢搵買家囉！」唉，堤亞高文廸斯咁衝動做咩呢？