鞏俐嫁畀新加坡籍丈夫黃和祥12年，根據新加坡《星期天時報》日前報道，鞏俐已經成功獲得新加坡公民權。係人都知佢貴人事忙，但佢竟然忙到連幾個鐘時間都抽唔出，冇喺限定期間出席公民宣誓儀式，俾網民炮轟佢一心想借入籍新加坡做跳板，最終目的其實係想攞美國公民權。
一年返去兩三次
鞏俐本來喺上月23號要出席新加坡高等法院舉行嘅公民宣誓儀式，親自領取身份證，但係嗰日就唔見佢出現，新加坡當地有人質疑佢嫁作新加坡婦，原來一年踏足獅城只有兩至三次，基地仍然喺北京或者香港，呢次宣誓又唔見人，以佢往返獅城嘅次數，根本唔配做公民。
但係都有新加坡人持相反意見，話鞏俐名氣咁大，中國都當佢係國寶，如果佢入籍新加坡，會大力推動新加坡喺國際間嘅知名度，好過新加坡運動員喺奧運攞金牌咁話，同埋最好鞏俐早生貴子，用名氣提高新加坡出名低嘅生育率。