晚上訪何小姐昇悅居的家，即使亮着全屋的燈還感一股幽暗！瞳孔努力擴張，即被吸引的就是四幅不同顏料的牆，其中一幅更像街頭磚牆。設計師Jack話屋主從事服裝生意，對潮流敏感，唯一要求是「型」，故他花兩個月，約20萬將這550呎單位打造成街頭感。誰還敢將返屋企對住四堵牆等同悶蛋事？
記者：林佩婷
攝影：譚盈傑
Model：Tami
服裝提供：PIXIE（27211130）
資料提供：JackChung（水田內裝60501126）
四面大膽用色
單是客廳，已含四種不同的用料及顏色！當中兩幅主牆分別用了灰及墨綠色，同樣都是冷色系，感覺昏暗之餘又好協調：「相信好多屋主都未必敢用冷色，因稍不小心就會將間屋變得好黑。但灰同墨綠本身暗得來都夠鮮明。至於一般地板太普通同太亮，所以我選用啡灰色地磚，營造地下有沙的感覺，黃色燈打落去，反射後都可將幅綠牆變得黃黃哋。」
好戲在後頭，為加強街頭感，四面牆的其中一幅砌磚頭。但Jack提醒：「千祈唔可以全屋牆都用磚砌，咁會令空間變得好有壓迫感。」餘下一面牆更以鏡面配合粗黑框架，同樣為將燈光折射出去營造線條美外，Jack還有一個目的：「將鏡門關上，就好像將房間同客廳隔絕，有種進入密室暗格的神秘感。」
玩懸浮鮮黃吊櫃擴空
全屋家具以黑為主調，就連梳化都好似好殘，但走廊偏偏就有一排鮮黃色吊櫃，Jack就話這個櫃特意做鮮黃色：「全屋本身已經好黑好暗，如果突然有一兩件家具呈相反配搭，就變得好突出。黃色可化解到暗色牆身，反而帶起幅灰色牆。而這幾排都是鞋櫃，就咁放地下睇落走廊就好窄，所以我將佢吊起，營造半空感覺，消除壓迫感。」
玩燈效貫徹街頭風
行勻成間屋，發現燈飾超多，以一間500多呎的屋來計，竟有超過10盞不同形態的燈。可即使開行，仍是昏昏暗暗，Jack話成批燈都是特地挑選：「能否照明只屬其次，最緊要夠特別同得意。而且燈罩顏色較多變化，又好鮮艷，同樣將燈光打在牆身造成特別燈效。當然，若天花燈不足以照明的話，就在櫃上下設燈槽，光得來又唔刺眼。」
玩明亮白色書房
睡房跟大廳風格一樣，Jack考慮到屋主是女性，故選用泥黃色牆身添女性化。不過入到書房，風格截然不同：「工作地方最好比較光亮，所以選用白色作主色，為顯得更女性化一點，用了花花牆紙，但又不想用白色光管破壞整體環境，我就用了白色膠燈箱，天花則安了小吊燈作裝飾。但為貫徹全屋風格，便將房門拆走，裝成珠簾，與周圍環境配合。」
設計師：酷屋深淺有序
若想仿效這種多色設計，Jack話不能只執着於某一範圍，而是要注意整體氣氛：「無論用冷或暖色系，都不可單一選用，總要有些地方冷暖配搭。若主用冷色就不宜混雜太多色，且要深淺有序、有層次，如黑→灰→淺灰。至於燈飾，留意射線及折射效果，諗清楚是主照明、裝飾性還是作飾品照明用途，這才易作出選擇。」
