汪明荃（阿姐）上周主持《奧運金牌精英大滙演》時，被指對郭晶晶及吳敏霞等金牌選手無禮，觀眾向無綫投訴，網友又連日炮轟，但阿姐仍然死撐。鄭裕玲和鄭丹瑞昨日未敢表態，網上更有人成立反阿姐聯盟。
汪明荃上周六擔任《奧運金牌精英大滙演》司儀時，訪問跳水金牌選手郭晶晶和吳敏霞期間呼喝王峰上台，又狂窒郭晶晶和吳敏霞，惹起網民聲討，不過阿姐前日仍死撐「運動員唔係大晒」，令網民更不滿，有網友在Facebook成立「反汪明荃！咁無禮貌，影衰香港啊！！！」聯盟，觀眾則致電無綫投訴。
嘟嘟：佢想搞氣氛
阿姐好友鄭裕玲（嘟嘟）昨日與鄭丹瑞（阿旦）及陳敏之在尖沙嘴出席無綫籌款節目《萬眾同心公益金40周年》記者會，談到阿姐在《大滙演》的表現，眾人即面有難色，嘟嘟先說：「我冇睇，冇得回應，咁對人唔公平。」她受訪時，阿旦在旁緊張地不斷提醒她：「小心啲，小心講嘢。」嘟嘟猛點頭，可見大家都擔心談論阿姐會招惹麻煩。
不過嘟嘟言語間仍替阿姐護航，她說：「阿姐無非想搞氣氛，網民喺網上批評好容易，打幾個字已經可以，冇辦法控制，最好唔好畀佢哋（網民）意見登報，佢哋喺虛擬世界，寫乜都得。都唔知點解佢哋咁大反應，我都成日講笑啦，自己有時都會話人，但會睇當時氣氛、環境，做番平時風格，我冇講過阿姐唔好。」嘟嘟和阿旦非常認同做直播要小心，壓力也很大，若控制不了場面，會否表現𤷪𤺧，陳敏之則說：「我真係唔識答，好難答。」
無綫接12宗投訴
無綫昨日承認接獲有關阿姐投訴共12宗，外事部發言人蘇先生昨在電話中說：「觀眾反映話阿姐唔應該用催促方式叫運動員上台，無禮對運動員不敬，亦有投訴阿姐唔應該問運動員私生活，TVB會將投訴交畀相關部門作出反映。」
同樣經常遭網友狠批失言的陳百祥（阿叻），前晚在九龍灣獨撐阿姐說：「因為運動員冇綵排，頭part已經超時咗十幾分鐘，阿姐控制時間好緊張，運動員唔知，阿姐都係一時心急，佢都做咗本份。」此外，無綫上周六直播《奧運金牌精英大滙演》收視平均12點（約75萬觀眾），稍後重播平均收視19點（約119萬觀眾），亞視直播則只有4點（約25萬觀眾）。
採訪：張俊銘
攝影：仇志德
一網講盡：網友勸阿姐講少句
阿姐昨日回應《奧運金牌精英大滙演》上失言事件時，一句「運動員唔係大晒」及「網民係咪巴閉到咁」，簡直火上加油，眾網友除成立反阿姐大聯盟並繼續狂轟她。
bigmouth2006：阿姐，你回咗塘了，人哋幾時嫁，關妳咩事？八卦問題，唔好話係代表香港市民！
stives：哈哈，汪阿姐咁答都頂癮…作為觀眾，我就一啲都唔關心晶晶幾時嫁人。至於王峰…若果佢真係行得慢，汪阿姐都可請人行快啲！
西門吹雪！：其實她不要再講那麼多就當幫忙啦！
freedomandy0212：如果阿姐覺得運動員唔係大晒，咁係唔係代表無綫嘅主持大晒呀，人哋點答係人哋嘅事。
神祕俠：成件事無論點睇阿姐都有錯，如果佢講一句呢件事我都有做得不好的地方，相信比佢死不悔改更能保全她的面子！
antpenz：開玩笑？！你𠵱家啲回答真係開玩笑，諗下自己咩態度嚟講吧啦
資料來源：香港討論