應屆港姐冠軍張舒雅、亞軍陳倩揚、季軍馬賽同旅遊大使高海寧喺吉隆坡繼續親善之旅，噚日佢哋喺酒店嘅泳池着住三點式泳衣拍攝花絮，連主持人陸詩韻、陳自瑤（YoYo）都不甘示弱，齊齊性感打扮騷逼爆身材，不過日漸消瘦嘅張舒雅，就瘦到得棚骨咁。
自認發水腫
高海寧喺參選港姐時身材一向係話題，不過噚日佢忽然肥咗好多，尤其大腿位置，高海寧惟有以笑帶過回應，佢話：「吓，咁都俾你哋睇得出，我有啲水腫，而且肥晒喺對腳度，睇醫生話我內分泌失調喎。」通常體形肥咗之後會連帶上圍都升級，高海寧話：「我嘅上圍反而縮咗，我都好奇怪。」至於馬賽比起參選時肥番十磅，佢話：「早兩日着番選港姐嗰件旗袍都逼到食唔到嘢。」
主持鬥搶鏡
陳自瑤同陸詩韻身材都算平均，前者上圍仲幾有睇頭，YoYo話：「我係第一次着三點式影相，見到個個港姐都着，身為主持唔着會唔配合。」陸詩韻嘅身材都幾搶鏡，佢好謙咁話：「我唔係搶鏡，啲港姐身材好好，今次呢個旅程夠瞓又有好嘢食，見佢哋都肥咗！」