轆Book：3日2夜Tucson芳心戰

好多人話韓國車唔掂，但馬路明明有好多Hyundai周圍飛。查實韓國車今非昔比，所謂「好多人」，只不過人講你又講嘅觀感而非事實。Hyundai十零萬貨仔抵玩又實用，專奪女人仔芳心，邊個話㗎？我都係女人仔，我話嘅。

記者：方糖
攝影：王文忠
模特兒：Enrica

愛上四個轆

女人，尤其多心，多心即係貪心，貪心到又想咁又想咁，一部車要完全奪到女人芳心，要無嘢再可以挑剔，一啲都唔易，Hyundai除外。點解？因為經3日2夜長期測試後，我發覺HyundaiTucson2.0好實用，實用唔夠，仲要平，女人仔如我，已經愛上佢四個轆！Enrica話：「價錢實惠、型英帥靚正、置物率高實用性強，我諗，呢部車征服到所有女人仔。」唔想太過鱔稿，不過真係要同Hyundai講番句公道說話，呢部車揸返工見得人，Clubbing掃貨唔礙眼，買餸扮闊太無難度，接載老人家或送小朋友返學放學都一樣掂。
又點解講到乜都得？因為操控容易，2.0公升引擎搭配CVVT波箱，馬力成142匹，軚闊雖不及同款SantaFe，但轉向準確性高；心血來潮可以拍向左，用加減波玩車速，推一推個掣又享受到駕駛樂趣啫。
新一代Tucson外形出色，媲美中高價及歐洲SUV車款，設備齊全，恒溫式冷氣系統、真皮軚環波棍等等有齊，車價稱得上實惠，故引入市場即掀起韓國SUV熱，唔信望吓條街，總有一部Hyundai喺左近，所以唔好再人云亦云，話韓國車唔掂嘞。

■新一代Tucson內裝齊備，連i-Pod都用得到。

■車廂空間足，有埋天窗更開揚，走海邊最正。

■後排空間感十足，攤屍咁攤都唔會太頂腳。

■2WD前驅加上扭力夠，上落坡同斜路絕對輕而易舉。

■尾門尾窗可以獨立開閂，隨手攞嘢唔使開門咁麻煩。

抵玩耗油量低

Tucson2.0車身比一般2.0公升揭背車略大，但揸起上嚟又唔覺太大嚿好笨拙，但兩面側鏡偏細，較難睇到盲點。上車，坐定定，先Feel到座椅好夠承托力，伸腳舒服空間感足；踩油，老實，起步唔算順，或者係新車之故，心諗既然係咁，就一於不負試車之責，瘋狂踩油。由將軍澳行東廊來回柴灣幾轉，再走石澳睇海，到東涌睇飛機升降，約埋Enrica茶敍睇戲吹水，兩日下來，Tucson起步唔單止順滑得多，加速轉波入彎都利落爽快，就算泊位都好易操控，兩三下手勢就搞點，即時笑逐顏開，得米。交車，睇番咪錶，耗油表現OK掂喎，跑咗三百幾公里個油燈先着燈，大約每公升行12.4km公里，抵玩，真真抵玩。

■中控台設計唔算出色，金屬飾邊感覺更Cyber。

■選配側鏡指揮燈，我就寧願面鏡大啲嘞。

■車頂加多個金屬行李架，外形更醒目。

■三圓錶板，行車資訊清晰。

■車身大但操控性高，泊位話咁易。

HyundaiTucson2.0規格

引擎：1,975cc，直四
馬力：142ps/6,000rpm
扭力：18.8kgm/4,500rpm
傳動：五前速半自動波連+/-波箱，2WD
車價：$162,000
查詢：現代汽車（34288288）