一向敢作敢為的阿姐汪明荃前日為《奧運金牌精英大滙演》擔任司儀，訪問跳水隊成員時，猶如「野蠻奶奶」上身，先呼喝老大哥王峰上台，後暗寸吳敏霞成績不如郭晶晶，然後再迫問郭晶晶是否要嫁來香港，惹來網民狂轟。阿姐昨日逐一反駁自己的失禮表現，強調並非不尊重運動員，她說：「行到慢吞吞咁，運動員唔係大晒吓？」
汪明荃前日在香港大球場擔任《奧運金牌精英大滙演》的司儀，訪問夢幻跳水隊各成員時，當眾呼喝正走上台的跳水隊老大哥王峰說：「請你快啲啦吓，我哋直播㗎！唔該。」隨後阿姐訪問吳敏霞時，當眾問她估計何時能超越郭晶晶，令吳敏霞一臉尷尬，然後阿姐又指吳敏霞回答說滿意自己表現的答案一般，應該說希望郭晶晶趕快嫁到香港。另外，阿姐獻唱《勇敢的中國人》時，又要求體操選手楊威拍手，她前日的表現惹來網友狂轟，直指阿姐失禮，對運動員不夠尊重。
昨日阿姐在沙田拍攝海馬廣告，其間回應遭網民指摘一事時不慍不火，盡顯阿姐本色。對於指吳敏霞答法一般，阿姐說：「純粹一句講笑，𠵱家好多人都關心郭晶晶結婚退役問題。」她又認為叫吳敏霞說想晶晶趕快結婚並無不尊重，她說：「冇乜尊重唔尊重，暫時未及佢（晶晶）係事實，人哋攞咗兩屆冠軍，佢未攞過，我冇貶低佢，想叫佢叫郭晶晶快啲結婚，佢咪有機會囉！」
自言緊張
「佢行到慢吞吞咁」
至於呼喝王峰上台，阿姐不認同地說：「我唔覺得囉！成隊人上台，佢仲同人傾緊偈，當時問緊郭晶晶問題，郭晶晶冇答我，要叫佢（王峰）上台，作為主持係要問佢問題，叫佢快啲，行到慢吞吞咁，運動員唔係大晒吓？唔係㗎嘛！我都好緊張，因為TVB係直播，唔可以冇嘢講，我唔expect佢行得咁慢，全村人等佢，唔係唔知呀？」
說到網民在討論區上的聲討行動，阿姐有感而發地說：「我有一樣嘢要反映，𠵱家好似講少少嘢都唔啱，網民係咪巴閉到咁？你哋鍾意點寫就點寫，掂吓都唔得，要呵要錫就死啦！我唔覺得自己有惡意，主持係要揸緊時間，我問郭晶晶問題，佢係都唔答我，唔知啱唔啱，我只係代表觀眾問，我就冇興趣，結唔結婚關我乜嘢事。」阿姐又指所有問題都是照稿發問，而且大滙演像嘉年華會，不需要問一般正經問題。
男友力撐
「阿姐性格好率直」
另一方面，身為阿姐男友的羅家英，昨日被問到阿姐呼喝運動員一事時，他在電話中說：「我梗係要撐佢啦！佢慣性係咁（講說話語氣），對工作好認真，面對鏡頭好緊張，尤其係直播節目，佢點會唔尊重啲運動員吖？可能佢自己都唔為意。」對於阿姐問吳敏霞的問題被指失禮，羅家英說：「佢唔想問嚟問去都係嗰啲問題啫！阿姐嘅性格好率直，我覺得冇乜嘢問題。」問到阿姐平時對他說話的語氣如何時，羅家英說：「兩個人嘅嘢唔講得，有時大聲有時細聲啦！」
此外，前日有份與阿姐一起擔任司儀的朱凱婷，昨日則在電話中說：「唔覺得阿姐呼喝運動員，本身公司都set咗問題畀我哋問，可能阿姐只係因應佢個人熟悉又或者代表觀眾問一啲大家想知嘅嘢，都唔係負面嘅。」
採訪、攝影：魯萍
汪明荃連環出招
汪明荃前日在大滙演上先呼喝王峰，後窒吳敏霞和郭晶晶，掀起外間不滿，以下為現場對話原文照錄：
汪明荃：（普通話）郭晶晶，你對於國家跳水方面獨領風騷，你覺得最大的關鍵是甚麼？
郭晶晶：我們可不可以先請王峰上來，因為他也是我們整個團隊的一員。
汪明荃：（廣東話）王峰呀係咪呀？
其他司儀：（廣東話）王峰你喺邊呀？
汪明荃：（普通話）你怎麼離隊啦？
陳百祥：係呢？點解漏咗王峰嘅？
汪明荃：（廣東話）請你快啲啦吓，我哋直播㗎，唔該！
朱凱婷：郭晶晶真係大家姐，佢知道王峰未上到台，希望……
汪明荃：（打斷朱凱婷以普通話說）快點！快點！
劉璇： 我們用掌聲歡迎他。
郭晶晶：其實……
汪明荃：（插嘴以普通話問郭晶晶）你現在是不是回答我的問題呢？
郭晶晶：對對對!
汪明荃：（普通話）哦……那我們聽你講呢！
郭晶晶：因為我們是非常團結的團隊，所以一定要峰哥上來，這也是為甚麼跳水隊能夠有這麼好的成績。
汪明荃：（普通話）哦……那你是不是特意安排他遲上來呢？
郭晶晶：（面露尷尬笑容）沒有。
汪明荃：OK，OK！（普通話）吳敏霞，當然你的表現是非常出色，但是你估計自己甚麼時候可以超越郭晶晶的成績呢？
（吳敏霞表現得非常靦腆。）
汪明荃：很難回答嗎？這個問題。
吳敏霞：其實我覺得在比賽場上，只要做好自己，把自己在平時訓練中，最好的水平發揮出來，展現給大家，我就做到我自己最好，我就滿意我的表現。
汪明荃：（廣東話）唉！其實你呢個答案真係好一般呀！你應該話等佢（郭晶晶）快啲結婚，嫁嚟香港，咁我就有大把機會啦嘛！
吳敏霞：我希望郭姐一直跳下去。
汪明荃：（以普通話對郭晶晶繙譯）我跟她說假如你來香港，她就有機會拿金牌，她就說希望你一直跳下去，那你自己的打算到底是怎樣呢？
郭晶晶：我肯定真的想一直跳下去。
汪明荃：哦，真的嗎？
郭晶晶：對，因為在這麼優秀的團體裏，我捨不得離開。
汪明荃：好，我們期望你、期待你更出色的演出。
郭晶晶：謝謝！
一網講盡
網友指摘冇禮貌
汪明荃前日在《奧運金牌精英大滙演》上連番失言，遭網友狂轟，更要求她道歉，反應激烈。
choiho：真係好冇禮貌！完全唔識尊重人，人哋係嘉賓啊！佢講嘅嘢好有問題，咁即係寸吳敏霞成日俾郭晶晶騎住啦！
typhoon88888：t×b重播時就cut咗佢呢幾句話，擺明都feel阿姐啲attitude（態度）有問題啦！
stormminister：啲運動員上台前着番好件褸都係尊重場合，慢幾秒係咪影響咁大呀？
littlebeebee：以佢性格，佢一定唔會道歉。突然諗起杜琪峯話過佢阻住地球轉，哈哈哈！
ARFISH：提佢行快啲都係理所當然嘅事啦，仲要係做緊直播。一陣佢行得慢，台上仲有N咁多人等佢答問題喎。
superxun：咁趕咪叫佢唔好唱《勇敢的中國人》啦，阻住晒，人哋係睇運動員㗎，夠膽唱得咁難聽，佢先係勇敢的中國人。
資料來源：香港討論區、壹蘋果論壇