企業講環保係大勢所趨，環保人士周不時都批評上市公司浪費紙張，尤其係每年向小股東郵寄大量通告、中期報告同年報等，試問有邊個小股東真係會拎嚟睇，最後咪用嚟墊煲或者丟去堆田區。
港鐵（066）為咗鼓勵股東選擇以電子形式收取公司通訊，代替傳統印刷品，減少浪費紙張，向股東大派現金購物券。頭2萬名股東喺今個月25號前，寄返張回條畀港鐵，話揀電子通訊，就會收到30蚊港鐵站商店購物現金券。
華華記得，之前中銀香港（2388）亦都用美心西餅，𠱁股東揀電子通訊，一家便宜兩家着。以價值計，一打美心西餅市價40幾蚊，大手筆過港鐵，但港鐵有咁多家商號，選擇就多啲，各有可取，最緊要夠環保嘛！