斯文惡死理應唔可以撈埋一齊講，但好奇怪，無論問識車嘅行家，唔識車嘅路人甲乙丙丁，都一致裁定富士Impreza2.0S-GT斯文得嚟有跑味。一踩油，轟轟聲，操控性能一流，扮乖仔得，心血來潮想飆就飆，隨時變臉，唔使擇日。
文：方糖
攝影：王文忠
模特兒：Tiffany（TheGroup）
斯文惡死合二為一
黑色，從來都沉實唔招搖，熄咗頭燈隱伏路邊一角，靜靜泊埋一邊，你分分鐘唔覺眼佢存在，呢份斯文，同SubaruImpreza2.0S-GT車身顏色好有關係；OK，好嘞，到踩盡油門喺路面左穿右插玩狂飆，大大碌尾喉惡形惡相，咆哮聲響到坼天，慌死人唔知佢好跑得，斯文同惡死，原來可以合二為一。
Subaru前排已經引入自動波Impreza2.0S-GT，性能依然有保證，但論好玩程度，無得講，一定係棍仔稍勝一籌。等到頸都長，終於等到Subaru推出手波版，新車八月抵港，引擎馬力同自動波無分別，依然係新式五門揭背車款，惟四前速手波連加減模式波箱換作五前速手波波箱。滿分期待竄入車廂，望住支短波棍，感覺好High，唔知轉波係咪快夾爽呢？無謂口水多過浪，坐定定，踩油跑轉直路，Wow，加速快而直接，不愧為棍仔，操控爽快轉波利落，車身反夠靈敏，軚環軚感足，能準確傳嚟車訊，轉向亦見準繩；高速入彎，Wow多次，準而利落指向性高，足見車身剛性足，好玩，不過相信耗油度亦好可觀。
長腿姐姐坐得舒適
講跑味，SubaruImpreza2.0S-GT黑實富運動感，高腰線、新式網狀鬼面罩連鍍飾、低地台，話畀你知呢架車絕對惡得起。內櫳唔算狹窄，無頂腳就呃你，但長腿姐姐Tiffany一對白到反晒光嘅大髀，依然有足夠空間左Fing右Fing。
講斯文，揭背車一向予人淡定感覺，內裝方面，摺起後排尾廂容積激增，中控台用番黑色做主調色，同車身顏色統一，設計簡約鋪排唔浮誇。要挑剔嘅係，17吋合金軨連薄胎，外形係就係夠煞食，但高速行走嗰陣，後排乘客會比較扽，後生細仔就話唔扽唔安樂，骨頭卜卜脆老人家？都係咪搞咯，自己執生啦。
SubaruImpreza2.0S-GT規格
引擎：1,994cc，水平對向四汽缸DOHCTurbo
馬力：250ps/6,000rpm
扭力：34.0kgm/2,400rpm
傳動：五前速手波，四驅
車價：$245,500
查詢：意美汽車（25112727）