溏心風暴之家好月圓鬥戲人辦第六回
七十年代憑佳視劇集《射鵰英雄傳》俏黃蓉一炮而紅的米雪，近日在《溏心風暴之家好月圓》中作從演30多年來一大突破，化身終極奸人殷紅的她心狠手辣得令觀眾刮目相看，就連米雪男友尹志強也笑咪咪大讚好睇，米雪今趟奸得出色，奸得有價值。 撰文：戴彩煥
黃蜂尾後針，最毒婦人心，套用在《溏心風暴之家好月圓》中殷紅角色最貼切不過。跟《溏心風暴》中莉姨善良正直剛好相反，米雪今次飾演的殷紅心腸惡毒，手段卑鄙陰險，是《家》劇中的終極大奸角，也是她從演數十年來奸得最徹底的一次。米雪日前接受訪問時認同說：「都算係，之前《突圍行動》個角色係奸，但都畀觀眾睇到佢始終係個好媽媽，我今次就全心全意對付荷媽一家人。」
「未做到最盡」
做了這麼多年好人，今次一改形象，難道不擔心影迷會抗拒？米雪說：「唔會，𠵱家啲觀眾好聰明，知道做戲。我好畀心機做好呢個角色，無論服飾髮型同角色，自己事前都設計過，之前細契關菊英嗰啲係小婦人嘅奸，但殷紅係做開大生意嘅人，如果場場戲都係鬧人『倔』住人，就會太多，冇咗個效果，亦唔啱我高貴身份，所以一開始我就同導演講，我唔會做咁多表情，我嬲嗰陣會畀觀眾見到我笑，臨尾先至會厲一厲人，我覺得幾得意幾好玩吖。」
米雪表示近日在街上不少市民指她很奸很衰，也有讚她奸得靚，甚至有年輕一輩喜歡殷紅奸得有型，證明影迷觀眾受落，不過米雪卻嫌不足說：「其實我未做到盡晒，我收咗啲，因為殷紅本身都未去到咁奸。」
紅姨恩將仇報害荷媽（李司棋飾）夫離子女散，難道還不算奸？米雪聞言即為殷紅平反道：「阿紅當時老公走咗，佢帶住個女，所以咪急於搵個扶手棍囉，當時最就手就係夏雨，但佢同咗我一齊之後唔守規矩，成日返荷媽度，做女人點都有少少呷醋，佢同啲仔女咁happy，即係我呢度唔happy啦，佢同我君子協定話唔再返，但原來係呃我嘅，我梗係嬲啦，不停諗計仔叫佢返嚟我身邊，本來唔算壞都變咗壞啦。其實現實生活中大把人係我呢個角色，我只係攞番我想要嘅嘢，就係感情，就係Jo飽（夏雨飾）呢個男人，我攞唔到個人先至攞錢啫。」
質問男友劇情
問其男友尹志強有沒有欣賞她終極奸人演出時，米雪笑說：「佢有睇，佢話：『唔似你嘅，完全唔係咁嘅人。』佢好識𠱁我，每次我啲劇出街問佢有冇睇，佢梗係話：『好正呀。』我話你咁講好敷衍我啫，唔得，每一晚返嚟我都問番佢劇情，好多年前已經係咁，有時真係好想佢睇吓，好似今次《家好月圓》問佢有冇睇，佢就咪咪嘴笑話好睇！」尹佬簡單一句讚美說話，已叫米雪甜到入心入肺。
搶先爆：Jo飽整月餅團圓
今晚播映的第23集《溏心風暴之家好月圓》，劇情講述Jo飽（夏雨飾）為遵守對子女在童年時許下的承諾，打算獨力在中秋節前製作一個33吋大月餅，可惜經過多番嘗試均失敗，最後在荷媽（李司棋飾）及一班仔女協力下，終於順利完成。家樂（楊天經飾）在中秋節團圓時當眾向永慶（陳法拉飾）求婚，永慶答允。
另一邊廂，Sa姨（關菊英飾）和恩賜（阮兆祥飾）為在港的生活煩惱，貪錢的Sa姨遂施以眼淚攻勢，迫父親（周聰飾）向Jo飽索1000萬元，作當年被騙去餅店招牌的心靈賠償，最後被荷媽發覺而事敗。
溏人心聲
最愛劇中金句：「人在天堂，錢在銀行」
米雪喜歡殷紅這句對白是因為夠實際。
自選最愛場面：掟走手機洩憤
Jo飽（夏雨飾）經常瞞着殷紅（米雪飾）到荷媽（李司棋飾）家與子女敍天倫，殷紅獲悉後大感不滿，一度憤怒到在房間掟手提電話。
表現最好演員：夏雨菊姐出色
「每位表現都好好，特別係關菊英同夏雨，前者演出一氣呵成，夏雨就處處表現出男人嘅無奈，表現相當自然真實。」