電視節目監製C小姐睇奧運閉幕禮，見劉德華成龍等人高歌一曲《遠方的客人請你留下來》，忽生感慨，懷念佢嘅讀書年代。佢話八十年代初新亞新聞系歌唱人才多，屢得中大系際混聲合唱冠軍，而《遠方的客人請你留下來》就係佢哋嘅「飲歌」，憑此曲贏得幾次比賽，男女聲獨唱部份分別由洪朝豐、張結鳳負責。咦，經佢一提，洪朝豐已經好耐冇在娛樂版出現咯喎，去咗邊呢？呢位朋友唱歌係好掂嘅。張結鳳本是報壇名記者，一枝健筆，《華僑日報》結業後，竟然冇傳媒請佢，可惜也，佢後來到咗半官方機構工作，業餘專注於崑曲，自得其樂。監製C嗰兩三屆新亞新聞系同學有唔少投身傳媒，例如陳慶嘉（阿寬）、李月蓮、潘源良、陳鐘坤、洪朝豐、梁鳳儀（副局長）、陸錦榮、張劍虹、張結鳳、馮德雄、林美香、李玉蓮、黃麗君、游淑儀、盧愛玲、李志超等等，可說人才甚盛，再講多一屆，就有報壇嘅7-MillionDollarMan盧永雄、蕭世和、馮偉光、施純港、曾仲榮等，粒粒皆星。
不說少年時，回到現實，監製C有乜搞作呢？佢話破天荒與日本公營電視台NHK合作拍咗一套戲劇，共兩集，每集一小時，九月六日星期六與十三日晚上七點半在翡翠台播出，NHK要到明年春季先至播，男主角係成宮寬貴，女主角係劉心悠，以高清拍攝，內容由魚蛋與烏冬呢兩樣香港、日本著名小食牽動。魚蛋與烏冬為戲劇主要元素，青春男女做主角，講乜嘢呀？監製C話：「你到時睇電視啦，你都唔知劉心悠係邊個，講你都唔會明！」咁又係，左丁山對啲青春演員的確烏sirsir，未睇過，冇發言權。日本好似從來冇同香港合作過拍電視劇，呢齣新劇叫做《幸福的味道》，是為首創。聽講NHK在日本青春劇方面，落後商營電視台，呢次搵公營嘅RTHK合作，如果成功嘅話，可以幫助NHK在日本挽回已流失嘅年青觀眾。香港嘅新廣播處長黃華麒昔日係電視劇高手，以後NHK繼續搵RTHK合作嘅話，正好開啱黃處長嘅波路。