幾年前，首富超人個基金會捐咗10億銀畀港大，校方為報答首富，將醫學院改名做「香港大學李嘉誠醫學院」，點知唔少人反對，搞到滿城風雨。啱啱過去嘅周末，類似嘅捐錢事件發生。內地中新網報道，滙豐慈善基金捐1.5億人仔畀北大，校方將北大深圳商學院改名做「北京大學滙豐商學院」，冇乜人話反對，唔知係貴人容易招風雨，定係以企業名義捐款，大家會易啲接受？
獅子行捐錢畀北大時，唔知係咪驚「歷史」重演，所以北大副校長兼北大滙豐商學院院長海聞話，外國好多商學院都同大企業合作，校方就用大企業個名冠名當係答謝，呢招係國際通行㗎啦。
答謝方式國際通行
獅子行大班鄭海泉亦話，以前佢哋都捐唔少，但都冇話冠名，今次冠名係同院校長遠發展嘅一種承擔。咁1.5億人仔會點使呢？1.2億會用嚟做商學院嘅設施及師生培訓等，其餘3000萬銀用嚟建立「北京大學滙豐金融研究院」，同埋設立研究基金。