呢幾日，香港人街頭巷議都係郭晶晶幾時嫁嚟香港、陳一冰啲肌肉有幾勁、超級丹又有幾cool等等，連八方都差啲唔記得，噚日係立法會選舉前嘅最後一個超級星期天。一班金牌運動員噚日傍晚終於勝利完成訪港親民大騷兼助選之旅，各個陣營嘅候選人都準備好，把握最後呢個禮拜，爭取之前被奧運吸引咗去嘅選民注意力。
市民忙追星唔理選舉
唔少人都認為，班金牌運動員奧運一完咗就急急趕嚟香港表演，唔多唔少都有為左派助選嘅作用。市民忙住追星，亦唔得閒理咩選舉嘢。實際效果係點，好快就知。𠵱家奧運完咗，運動員又走埋，各個選舉兵團終於可以叠埋心水向選民拉票。連任有危機嘅楊森噚日就大呻，奧運期間，佢嘅拉票活動完全受影響，佢試過晚黑去做家訪，家家戶戶都掛住睇奧運，唔得閒理佢。唔開門固然之係好多市民嘅回應方法，就算開咗門都未必好受，事關好多人只係開條門隙接單張，幾秒唔夠即係嘭埋道門，相信唔少候選人早排都同森哥身同感受。
森哥嘅強敵史泰祖似乎亦想班運動健兒早走早着，但佢係由佢本行嘅醫學角度而非選舉角度出發。佢喺網誌以「讓金牌英雄歇歇」為題，戥班運動員唔抵，覺得佢哋啱啱先完成激烈嘅奧運賽事，屋企都未返就要仆到咁嚟香港，肯定好攰。嚟到香港行程又密質質，冇乜私人時間，輕鬆得去邊？原來史泰祖日前有幸同國寶一齊參加宴會，只見國寶一直都忙住同人簽名同影相，根本冇機會享受眼前嘅美食。齋勞碌冇嘢落肚，怪唔得噚日有運動員喺香港歡送午宴中暈咗，去到澳門又有運動員要搽藥油。
有候選人就繼續食住奧運熱，話要喺選舉場上爭取最後一面金牌。工聯會王國興就話要用勤力往績，成功爭取新西第八金，即係最後一席，有信心喺教練鄭耀棠狂操之下有望上到金牌榜。不過新西幾乎個個候選人都叫「告急」，睇怕王國興呢招未必有效。睇嚟跟住呢段時間，最熱門嘅運動都非「告急」莫屬，究竟邊個叫得最似模似樣，邊過叫到走晒樣博大霧，唔知選民會唔會畀到分呢？
mailto:[email protected]