上個禮拜五，講開有位讀者朋友受市況影響，份保險投資計劃蝕錢。佢問敏妮好唔好聽保險經紀講，一筆過買基金，一半買落股票基金，另一半買落債券基金，博市況好一次過贏番，即使市況差，由於一半係股票一半係債券，就可以平衡風險。
敏妮唔知呢位朋友乜嘢年紀，但家下嘅保險經紀，好多都有讀過財務策劃課程，應該知道長線投資組合，股票同債券比例分佈，係視乎嗰位投資者嘅年齡嚟決定。年輕嘅一般會建議佢揸多啲股票，因為長線嚟講，股票投資回報會比債券高，即使股市有升跌，但由於係長線投資，可以時間攤薄風險。
基金有專人平衡風險
不過，越近退休，為免臨退休股市大跌，唔夠時間追番輸咗嗰部份，所以一般都會建議臨近退休改揸多少少債券，持盈保泰。
呢位讀者朋友嘅經紀，以半注買股票、半注買債券嘅方式，然後當確認股票升時，例如股票升咗5%，甚至乎升咗10%，就將注碼由債券轉向股票。喺呢個投資策略裏面，一早已經落咗一個assumption，就係股票基金會升，既然係咁，點解唔趁未升時，一注買落股票基金度，要知道基金嘅sellingpoint就係有專業嘅基金經理幫你投資，如果你信唔過要搵嘢平衡風險，咁點解仲要投資落隻基金度先？
再講，等隻股票基金升咗5%甚至10%先加注，同高追有乜分別，上望空間睇幾多，咁樣高追同聽財經名嘴揀股貼士然後入市，分別有幾大？後者贏錢可能仲快，成本仲低！
股票債券升跌幅不一
單憑呢個策略，敏妮對呢位經紀有啲質疑。首先，傳統智慧，股票跌、債券升，但跌幅係咪同升幅一樣？股票跌一成，債券就會升一成？如果唔係，股票跌得甘過債券，咁點平衡風險？
即使債券升幅真係同股票一樣，亦唔代表你唔使輸，買股票基金同債券基金，你都要畀首次認購費，透過保險公司買又要畀多一層手續費，就算有優惠，以後轉基金唔使轉換費，你一開始都要輸兩家（認購費）。
呢點就係敏妮上個禮拜所講，贏面最大係你個經紀唔係你。
http://wanmanli.com/blogs/