雖然我求大俠幾時都話，今時今日踢波係踢11個人，再冇「一人球隊」呢支歌仔唱，不過，睇到美職聯球隊聖荷西地震，自從簽咗英格蘭前鋒亨格比之後，就由啖啖肉嘅魚腩變咗有骨魚腩，真係唔到你唔服。
「魚腩」地震有起色
今屆才正式加入美職嘅聖荷西地震，由於拉雜成軍，今屆美職4月開「咧」，到6月尾先贏得3場咁大把，我求大俠長期捧佢哋對手，都賺咗唔少。不過，自從佢哋喺7月中簽咗曾經踢過高雲地利、曼城同諾域治等英格蘭球隊嘅前鋒亨格比之後，就成隊唔同晒，近8場比賽保持不敗之餘，喺前日迎戰肯薩斯巫師嘅聯賽中，仲憑亨格比喺完場前建功，以2:1勝出㖭！
喺好成績帶動下，地震由西岸包尾大幡升上尾二位置，同一度係西岸強隊嘅洛杉磯銀河同得25分，亦都不過落後西岸「1哥」侯斯頓戴拿模7分（未計周日戰果），有機會爭踢季後賽。
銀河10場未贏過
不過，同樣係以英格蘭球員為重心嘅洛杉磯銀河，呢期就真係唔多掂嘞。佢哋雖然有英格蘭萬人迷碧咸壓陣，但近10場未嘗一勝（碧咸７月初至今交白卷），即係6月中之後就未贏過，就算教練由荷蘭嘅古列治換咗美國名帥艾連拿，都仍然未有起色，真係令人擔心。好彩美職冇升降班制度，唔係銀河下屆隨時唔喺美職角逐。而且，喺艾連拿仲未執番好隊波之前，佢哋有前冇後嘅打法，就始終係買入球開「大」嘅球迷恩物；因為喺近6場比賽，佢哋就有5場開「大」！