一向好鍾意寫blog，仲好鍾意擺相上網公諸同好嘅「呆佬」，早排就俾人話佢成日借個blog晒戀情，暗示同「天真妹」拍拖嚟博宣傳，之後佢就靜晒冇乜新進展。
搶先爆花絮
早排關仁知道三色台搵咗呆佬主持一個新節目，仲去外地拍外景㖭，拍攝途中呆佬當然乘機狂影相留念，返到香港佢就將喺當地影嘅風景相同拍攝花絮擺晒上blog度晒料，有傳媒見到，咪唔該都冇句登晒出嚟囉，嗰個節目嘅監製見到立即火都嚟埋，因為個新節目未見街想保持神秘感，但就俾呆佬爆晒出嚟，監製當然詐晒型啦。呆佬咁鍾意喺blog度晒料，睇怕以後三色台都冇人再敢搵佢做嘢嘞！
Textby關仁
