今年開始內地推行新稅制改革，企業所得稅由以往33%降至25%，唔少內地上市公司上半年盈利增長動力之一，就係受惠稅務支出減少。不過，大陸嘅服務零售尤其係上市嘅食肆唔好開心得咁快，因為另一個隱形殺手正伸出魔掌，將大大加重佢哋嘅稅務支出。呢隻魔掌就係「稅控機」！
有份參與國內「稅控機」計劃嘅浪潮國際（596）主席孫丕恕同華華講，為咗堵塞大陸零售服務業逃稅漏稅，當局陸續要求全國4300萬工商企業安裝稅控機。裝咗呢部稅控收銀機後，店舖嘅收入狀況完全喺稅局掌握之中，因為稅控機直接跟稅局聯網。家陣已經有幾十萬個商戶安裝咗部機。
佢舉例話，北京一家食肆上半年因為裝咗部機，要畀成千萬人仔稅，比舊年交嘅200萬稅多4倍，咁就知舊時食肆逃稅嘅情況幾嚴重。唔知呢個係個別事件，定係內地食肆同業「行規」，否則上市嘅食肆股就大件事。