《蘋果批Online》逢星期一、三、五晚上九時開騷
Click入http://pie.appledaily.com收看
歡迎透過web-cam即時發表意見或致電29908648安排親身上場
電郵：mailto:[email protected]
網誌：http://pieatapple.wordpress.com
新界東十張名單，爭七個席位。從民調見到，幾位爭取最後席位嘅候選人支持度相當接近。《蘋果批》請到四位新東候選人，三位泛民，一位獨立，進行一場選舉辯論，其間，三位民主派候選人就住該獨立候選人政治身份問題擦出火花……
主持：楊卓華 高明輝
政治身份：獨立？建制派？
梁國雄：
講番政治身份嗰個問題，曾國豐曾經指摘過你（龐愛蘭）係新論壇成員，咁你就隱瞞咗，你就話你有好多其他團體。其實都合情合理，你有好多團體吖嘛，但係新論壇係一個議政嘅團體，亦都有參政……你話2012雙普選你贊成，但係新論壇就贊成有委任制，亦都贊成喺普選入面有篩選，你自己嘅睇法係點？係咪覺得新論壇係錯咗呢？
龐愛蘭：
其實新論壇係其中一個支持我嘅團體嚟嘅，佢係支持我嘅理念，新論壇嘅政治理念係點咁可能你要問新論壇先得，咁今次我參選有好多專業團體支持……我覺得我唔可以話代表新論壇，只可以話佢哋會支持龐愛蘭嘅理念。如果你支持我，你都可以支持我……我係新論壇嘅理事……
黃成智：
有啲人評論緊，（有人）要搵一啲似獨立、專業嘅候選人嚟打擊我哋（民主派）啲票……我希望你喺度澄清番係咪有人利用你呢個獨立身份、女性身份嚟打擊卿姐？
劉慧卿：
如果係獨立，就真係獨立，係唔會寫咩人支持。如果你話你係冇政黨，咁你咪寫冇政黨。𠵱家扮係獨立，又有咁多人支持，咁你點會係獨立呢？……（你）唔好咁樣啦，正正經經話畀選民知，「係！我係新論壇嘅理事，我代表佢」，咁咪清清楚楚囉。
評領匯
龐愛蘭：
領匯接手之後個商場喺管理、裝修、同舖頭上都有改善……將軍澳個事件其實都知個承包商出現咗問題，嗰個我覺得領匯本身都要同商戶有多少少溝通先可令大家合作好啲。第二呃秤嗰度我覺得做生意一定要有誠信……
梁國雄：
呃秤梗係唔啱啦！但係領匯就呃秤嘞……領匯買咗資產之後，佢係將啲資產外判咗畀啲分判商，啲分判商點搞，領匯係唔會管……我覺得你話係呃秤你自己唔好呃秤先啦！
劉慧卿：
當彩明街市商戶第一次擺市，我已經直接聯絡佢哋，我覺得問題好嚴重，尤其是我自己係政府委任嘅方便營商諮詢委員會副主席。如果呢個情況唔係方便營商，而係迫壓啲小商戶，我覺得呢樣嘢政府要關注……呢個情況亦都唔係淨係喺彩明街市，政府係要明白咩叫方便營商，咩叫欺壓小商戶。
黃成智：
領匯畀到我哋一個非常好嘅典範，就係一個無良商人嘅做法。喺公共屋邨入面，你改善商場，我都唔覺得有問題。但係你喺改善過程完全唔理公共屋邨居民嘅死活，我覺得呢個就唔係好嘅商人嘅做法。
似乎幾位候選人都集中講領匯續租事件，對於領匯防商販呃秤新措施就提得好少。究竟講得有冇道理？咁就由讀者自行判斷。
點對付濫藥？
梁國雄：
其實禁毒我同當局爭拗，青年濫藥嘅數字，我哋鬧到佢趴喺度，同埋我哋要求佢哋，徵求家長同意，做驗尿，（但）佢唔肯。
黃成智：
我想回應長毛話迫啲家長要（學生）驗尿，其實唔係一個好方法，自願都唔好，因為濫藥你唔使驗尿，有好多方法可以睇到。呢個我覺得加強番啲社工、學校做多啲輔導、教家長去關心年輕人先係治本辦法。
註：《蘋果批》論壇亦有邀請同區劉江華名單、田北俊名單，但有關名單均未能派員出席。同區其他候選人名單有：蕭思江名單、李子榮名單、鄭家富名單、湯家驊名單。
原裝片段重溫，請即上 http://pie.appledaily.com。
