消委會近日公開招聘投訴及諮詢部主管，月薪75,715元至87,225元，八方唔係想轉工，只係好奇消委會有乜風吹草動，原來「消委會二哥」、該會投訴及諮詢部首席主任陳永佳已經辭工。
佳哥向八方證實決定離開消委會，稍後離職。消委會新總幹事劉燕卿上任後，逐漸建立自己班底大展拳腳；內部消息稱，由於投訴及諮詢部有成50個員工，消委會總部唔夠地方用，成個部門早前被調至附近大廈，佳哥亦遠離權力核心。
八方問佳哥有乜好路數，佢話暫時不便透露，八方祝佢海闊天空，盡展所長。消費者要求越來越高，奸商又越來越蠱惑，佢個位真係唔易做。