李司棋經歷過兩次失敗婚姻，日前她接受商台錄音訪問時，稱現在若有朋友要離婚，她會叫對方考慮清楚。談及第一段婚姻，兩者之間出現第三者，被問到當時有沒有因為婚姻失敗而有挫敗感，司棋姐說：「冇，返到香港（當時已移民外地）床頭有女人嘢，都冇得忍啦。我離開咗香港一輪，佢（前夫）有機會同其他女人一齊，上床上到喺我張床，連我個女都企埋喺佢（前夫）嗰邊，我覺得好孤立。會覺得我對你咁好，你咁對我，所以就算佢求番我，返轉頭我都唔會要佢。」
再婚欠智慧
至於第二段婚姻，司棋姐最後也因性格不合分手，她說：「當時覺得好唔開心，人生最唔開心嘅時候，選擇婚姻我係冇智慧。最初覺得佢高大靚仔、屋企同我一樣大，又有個仔，佢年紀同當年我離開個女時年紀差唔多。結婚去完新西蘭度假返香港，佢話唔返屋企食飯，問吓佢點解，問一句就唔開心，佢啲朋友驚我太精明會管住佢。後來我就話去上海幫鄭明明做化妝公司，一個月返嚟一次。佢都有唔開心，但係佢捨得我走，咁咪算囉。」
採訪：王連連