呢排馮仁昭喺圈中聽到一個消息，話有線娛樂有限公司執行董事徐小明，欠香港世界宣明會成30幾萬善款未找，聽聞徐小明聽到呢個消息都好愕然。翻查資料，喺今年6月7號晚，有線舉行《抗震救災˙關懷共愛˙肥媽私房菜慈善齋宴》，當晚籌得嘅善款超過150萬，全數捐畀香港世界宣明會作四川賑災用途。
投得阿虫作品
當晚徐小明同太太李鳳鳴總共捐咗31萬，分別以26萬元投得鍾叮噹捐贈嘅玉器鳳凰連鯉，同埋阿虫所捐贈嘅小橋畫，另外徐小明仲額外再捐咗5萬蚊㖭。
究竟徐小明係咪仲未畀錢？馮仁昭向佢求證，佢講笑話：「咁都傳得？邊個同我咁大仇口呀!」佢為免大家誤會，仲出示銀行過數紀錄同埋香港世界宣明會嘅收據以示清白。有線公關部發言人張小姐就回覆話，呢次籌款活動，徐生嘅款項已經全數繳交晒畀香港宣明會，冇任何人拖欠款項，件事總算水落石出。