食物有金字塔，做運動都有金字塔。好多朋友成日話自己未老先衰，跑幾步追巴士就氣喘，應該「的起心肝」趁京奧熱做吓運動，參考吓呢個「體力活動金字塔」。金字塔最底一層運動應該日日做，塔頂啲活動就應該最少做，千祈唔好呆坐咁多，以免令膝關節提早老化。
衞生署最近出咗本書，教人保護膝頭關節，書名叫做《護膝防痛齊開步》，書入面有個四層體力活動金字塔，教大家應該做咩運動。最底嘅一層係幾乎人人都啱做，又最易做嘅運動，好似散步同做家務，唔好睇小做家務，平時掃地、洗碗、抹窗等，都可以幫助舒展筋骨；第二層就係一啲對心肺功能略有要求嘅耐力訓練，例如游水、踩單車、緩步跑同網球等。
金字塔嘅第三層就係每個禮拜只可以做兩、三次嘅肌肉力量訓練，例如去健身室做伸展運動、跳社交舞、或者打吓高爾夫球，最上層就係應該盡量少做嘅呆坐。
平日健康無大問題嘅人，就算長期無運動或者肥人，都可以照住體力活動金字塔，平均咁揀啲第二同第三層嘅運動做，對保護膝頭關節同提升體能都好有幫助。計我醫神話，𠵱家好多公園都有健身徑，大家應該善用吓呢啲免費設施，放工或者放假就去公園緩步跑，之後再去健身徑做番啲伸展運動，就fit晒活動金字塔嘅要求啦。
blog主：醫神