京奧熱潮過後，體育迷可能又會將視線轉回足球場上，我哋〈蘋果開倉〉今屆精兵出擊，7位名家準時每個周末同波友一聚；至於小弟主打一如以往會放喺英冠，不過剛開季並未摸清路數，暫時小注望跟回步速，頭炮捧今屆英冠擂台躉伯明翰讓球上盤。
賽績表縮細冇縮水
暑假忙於奧運工作，反而收穫不俗，因為根本無時間飲餐茶食蝦餃燒賣刨波經，同睇足球直播；反而贏得最爽係巴甲同挪超；足智彩最大貢獻，就係喺各開賭嘅二線波聯賽，搵當地專家寫軍情放喺佢哋嘅網頁內，唔使一眾普羅球迷花時間左搵右搵，呢類波雖然多數冇得睇，但落注後反可安心睡覺，起身有錢收仲睇到奧運女子沙排左飛右撲，不知幾盞！
奧運加波經左右開弓，全組同事早前做到頭頂出煙，亦不時收到讀者要求我哋將波經賽績表沿用上季size，首先喺度要多謝各擁躉寶貴意見；不過紙價飛漲，加上足智彩場數越開越多，連業餘水準嘅澳洲聯賽都唔放過，故新一季縮細賽績表實在逼不得已，事實上表格內容冇縮水，各項資料落齊，還望波友見諒並繼續支持。
唔吼盃仔專攻聯賽
言歸正傳，頭炮捧降回英冠後，陣容並沒縮水嘅伯明翰；周中作客修咸頓玩盃仔，收起正選門將、雙中堅同王牌射手菲臘斯只在下半場上陣下，輸波出局，擺明要全副精神放喺聯賽，今次作客季前缺少中堅杜靴廸後，場場失波嘅諾域治，坐和望贏格。
另一場心水，捧尾場深夜直播場次，銳意擴軍升班嘅葉士域治下盤，對手屈福特雖佔主場之利，名氣大但實力比上屆跌watt，今戰讓唔起。
蘋果波神
水準有目共睹，長跟必有着數。