以前選香港小姐只要求美貌與智慧並重，但現在的要求不同，最緊要是忍得、捱得，因為一旦踏上選美路，隨之而來的便是連串是是非非，今屆3位港姐同樣受到是非所困，冠軍張舒雅的新聞由頭帶到尾，在參選期間她過着沒有私隱的生活，難怪她慨嘆：「冇名銜仲開心啲。」而一直「恨」入娛樂圈的季軍馬賽，終得償所願，最少新聞的要算是亞軍陳倩揚了。 撰文：陳寶明
冠軍張舒雅
豪放港姐我行我素
冠軍張舒雅在選美期間負面新聞不絕，被指富家女憑名流評判當選，與男友親密咀嘴照曝光，煙酒夜蒲樣樣齊，可以說是歷屆從未見過的豪放港姐。張舒雅說：「選嘅時候冇想過會有咁多新聞，想唔到啲人咁犀利，不過我已經冇嘢唔可以畀人知，但係冇諗過冇晒私隱，真係有啲唔慣。」
張舒雅覺得拍拖是平常事，只不過她參加選美而被人誇張報道，她坦言：「可能冇名銜仲開心啲，我已經學咗平衡自己，以前嘅生活自由啲，𠵱家冇晒夜生活，要學得避忌啲，唔好俾人誤會，不過都會保留啲私人約會，我只想做好港姐本份，好在家人支持我。」
靠電話繫戀情
張舒雅自言性格夠真但頗固執，做得出不怕認，而且她較我行我素，她承認自己的思想是開放式，不是一個傳統保守的人，她笑說：「我唔識做家務，煮飯識識哋，絕對冇條件做賢妻良母，不過𠵱家都未有心理準備做賢妻。」
對於會否加入娛樂圈，她還未有決定：「我未知，都唔知想唔想入行，過埋呢15個月先，𠵱家嘅工作安排好好，我自己接受到。」若是她有興趣拍戲，倒有一件頭痛事要解決，因為5呎10吋半高的她，相信都很難找男拍檔，螢幕前難找對象，現實生活中卻已有意中人，提到男友，張舒雅說：「我係有拍拖，不過𠵱家好少見，我哋嘅感情仲OK嘅，惟有講吓電話。」
亞軍陳倩揚
當空姐睹明星百態
被指是黑馬當選的亞軍陳倩揚選美前曾任空姐，故待人處事十分成熟，她覺得成為港姐是十分難忘的事，不過當空姐同樣難忘，原來她曾服侍過陳冠希，她日前說：「喺上年過年前我見過陳冠希，佢好有禮貌，成日唔該前唔該後咁，我冇同佢影合照，因為我哋好專業，唔可以騷擾客人，但係有次遇見周潤發，佢主動問我係咪想影相，佢仲拎住部相機自拍，佢好好人，一啲架子都冇，佢仲叫我做主角企喺佢前面影相，我開心到暈。」
曾被客鬧到喊
陳倩揚續說：「其實做空姐見到好多明星，有Twins、古巨基、歐陽震華，佢哋都好好人，做咁耐都試過遇上啲較麻煩嘅乘客，有啲（空姐）會俾啲客鬧到喊，我都俾人鬧過，不過我好冷靜，耐心咁解釋畀個客聽。」當空姐時常面對不同國籍的人，陳倩揚可接受異國情緣？她說：「我好明白自己嘅崗位，試過有客人問我攞電話，不過我自己嘅立場，如果唔係有意思，就唔好令人誤會。」
四位得獎的港姐中包括高海寧，以陳倩揚算是最少負面新聞，不過卻令她容易被人遺忘，似乎有點蝕底，對此她說：「唔會蝕底，我嚟參選唔係為做新聞，係想學多啲嘢，人生經歷豐富啲，唔好嘅新聞寧願唔要，冇人留意都冇所謂，默默工作一樣有人欣賞，我唔會要求人人都鍾意自己，只要做好本份。」
季軍馬賽
自我挑戰拍床上戲
季軍馬賽是演戲發燒友，為了入行她出盡法寶，參選前她參加過新秀，卻未能獲獎，又在無綫收費頻道的娛樂新聞台工作、客串演出詹瑞文的電影，本來她傾過到有線驕陽電影做文職工作，無奈未有空缺，她甚至申請做奧運馬術禮儀小姐，只可惜她身高不足，未有入圍，結果塞翁失馬，焉知非福。
出盡法寶入行
馬賽選港姐飛上枝頭，雖未能摘后冠，但能躋身三甲已是邁向娛樂圈一大步，她笑說：「家人常取笑我冇條件入行，因為我唔夠靚，又唔夠高，冇優勝之處，點知畀我攞到獎㖭，其他人仲高興過我，真係大跌眼鏡。我媽咪開心到喊，因為平日佢踩得我最多，而我就覺得自己夠平均咪算，點靚都有人靚過自己，冇得比。」
對於不惜一切為入娛樂圈，難道真的很吸引？她直認不諱說：「我以前讀書係讀藝術，演戲都讀過，每年暑假就會充實自己，好似參加演戲同新秀，吸收多啲新事物，不過今年搵唔到嘢做咪去選美，其實係我契媽叫我去試吓玩。」
不甘平凡生活
皇天不負有心人，馬賽終於夢想成真，不過覺得仍有一段距離：「我鍾意拍戲，乜嘢角色都得，如果係性感我要睇角色有冇需要，健康可以接受，拍床戲都要睇劇本，為藝術都OK，拍戲係自我挑戰。」
馬賽最欣賞女星張曼玉、章子怡、張栢芝，還有王菲，她們全部均是愛情至上之人，而且都接近上岸收山，馬賽覺得她們在事業上的成就有目共睹，令人難以忘懷的角色，她們也是經過一番努力，之後便追求真正的自己，她承認自己的野心很大，不甘於坐在辦公室做OL，她相信勤力才有回報，在適當時候為自己爭取，她參選後看清楚不少人的真面目，有人用她來過橋，有人利用她，還有人真心想她好，幹這一行要有很強的接受能力，所以要捱得又要忍得。
攝影：葉君海
場地提供：FatAngelo's
服裝提供：BCBG
