簡單就是美，自訂車牌都係，越簡單越值錢。噚日舉行自訂車牌拍賣，「AK」以23萬元成交，其次係「WK」，競投到20萬蚊先有交易，買家話自用。
用廿幾萬買個車牌都唔算豪，噚日最豪買家係「NT」得主，拍賣官甫嗌出底價5,000蚊，在場有人隨即承價，第一口就嗌價8萬蚊，全場嘩然，大家相信佢志在必得，無謂同佢爭，結果一口價扑槌。
相信有特別用途嘅「MARRYME」嫁給我只值7,000蚊，番茄「T0MAT0」賣到10,000蚊，我愛你拍賣時創出天價，「1L0VEV」便宜好多，造價僅11,000蚊；真正空巴要十幾億美金一架，買個「A1RBUS」車牌掛上車，只要15,000蚊，「GUCC1BB」好矜貴，賣成27,000蚊。
車牌拍賣都有感人場面，盧先生用17萬元投得亡母英文名縮寫「GL」，因為想成日「掛」住媽媽；有間車牌公司以30,000元投得「LLL777」，聲言自用，不過如果大家鍾意，八方相信有得傾，做生意啫，唔會有人同錢鬥氣。