泰國又試發生民眾示威反政府，呢次仲突破傳統，民眾不止靜坐叫口號，直情衝入國營電視台，佔領廣播地方，唔肯走，另外佔領政府機關辦公室，意圖癱瘓政府運作。
示威搞手之一係林明達（華裔，前傳媒大亨，泰名Sondhi），泰國朋友知道林明達以前係他信嘅生意拍檔之一，往來甚密，後來他信當上泰國總理，林明達有所求，他信反面不認人，於是交惡，林明達幾年來都係反他信嘅急先鋒，現在他信已流亡英國，但他信啲舊部做咗總理，舊親信滿佈政府內，故此林明達繼續大吵大鬧。林明達在九十年代初曾被西方記者捧為泰國黎智英，在泰國擁有ManagerJournal，ManagerDaily，在香港搞AsiaInc，又辦過一張亞洲英文報紙，佢位香港揸弗人就係前些時見報嘅劉香成。林明達當年好豪氣㗎，左丁山出席酒會，同佢見面握手，發夢都諗唔到佢嘅傳媒大計劃好快就成畫餅，佢最後會成為街頭戰工。
左丁山大惑不解之餘，問吓啲泰國老友記。老友Ｓ回電郵：「此乃泰國反貪污戰爭，他信將泰國變成馬可斯治下之菲律賓，利用民主選舉，在鄉村地區公然買選票，五百至一千銖一張，除現金外，更大肆利用政府預算案去派錢，推出『一鄉一獎學金』計劃，送農村子弟入大學，他信及其同路人（指現任政權）嘅買票手法既廣泛，又多花款，明買暗買，皆挪用政府資源，反對黨民主黨無法贏得選舉，故此我哋要群起反對，外國人係唔會明白嘅！」
老友Ｓ住在曼谷，滿肚怒火。曼谷人通常與泰國農民（人民以農民為多）成對立面。農民鍾意政府救濟，鍾意政府派糖派福利，全世界都如此，非獨泰國為然，日本、美國農民都好倚賴政府派錢啫。只係他信集團當政治係一盤生意，派他人（納稅人）之錢嚟贏得選舉，執掌政權後就上下其手、集團式收水，各有各貪，陳水扁都自嘆不如。老友Ｓ讀經濟學出身，好怕當權者淘空國庫去派錢，同時私人收水，收到瑞士嘅銀行金庫都裝唔晒，故此佢好同情反政府示威。