人月兩團圓嘅中秋節就快到，小妹都想學煮幾味餸同家人過節，扮吓孝順嘛。早幾日搵咗稻香大廚鍾偉良師傅教路，佢話啱啱創作咗幾個過時過節啱食嘅上等菜，部份更加可以喺屋企自己煮嘅。
鍾師傅話，今次創新嘅六道菜，頭三個菜計有上湯野菌大蝦、貴妃羮、艷影舞台，可以配史雲生瑤柱上湯煮，味道清啲；而另外三個菜包括鮑螺海味煲、龍皇珍珠翅、金華火腿上湯浸珊瑚科甲，配金華火腿上湯啲味香啲、濃郁啲。
菜式簡單易做
但鍾師傅話，當中三道菜較簡單，適合家庭主婦做，好似上湯野菌大蝦，材料有越南九節蝦、雞髀菇、秀珍菇同冬菇，煮蝦要用新鮮，用上湯煮，時間唔好咁耐，蝦肉轉紅就OK；啲菇就要加鹽汆水，辟咗啲草味。
另一道菜叫艷影舞台，材料有玉子豆腐、蝦膠、帶子同蟹籽。鍾師傅話，今次以玉子豆腐代替傳統豆腐，將蝦膠釀入去玉子豆腐度再加帶子喺面，蒸六分鐘，再加蟹籽及淋瑤柱上湯芡汁就得。金華火腿上湯浸珊瑚科甲，將切片嘅冬瓜夾住火腿連蝦米放喺鑊入面蒸幾分鐘，另將珊瑚蚌加菇汆水，再放喺冬瓜面淋上金華火腿上湯芡汁就得。
鍾師傅見到小妹雞手鴨腳，建議話如果嫌麻煩，可以嚟稻香食，六道菜每款由48蚊到88蚊不等。
電郵：mailto:[email protected]
逢周六、周日刊出