意大利文GranTurismo（GT）意謂「一個偉大的旅程」，好豪情壯語，好囂張，但百幾萬身價，證明呢部車囂得起。豪，等唔等於品味？拗到天光無答案，A話唔使豪都可以好高格調，B話品味由S加兩戙堆砌出嚟，Gem就咁話：「Maserati，豪同品味兼備。」佢講得啱。
文、攝：周致中
流動名貴梳化
唔知點解，硬係覺得Maserati連個中文譯名都好有韻味，「瑪莎拉蒂」，好易令人聯想到甚麼索女公主。
好多人鍾意比較法拉利同瑪莎拉蒂，唔奇，大家都係意大利品牌，大家都係超級車種，大家都係過百萬車價，擺明同一Level。我就咁睇，法拉利雖然較多型號，但論舒適程度，瑪莎拉蒂有闊落內櫳始終勝一籌；論速度，法拉利固然上乘，坐上車，嗰種莫名賽車感即時浮現，腦裏面只會叮出一個「快」字，瑪莎拉蒂就有少少唔同，除速度外仲添多分豪華味，寬大真皮座位經人體工學設計，既有超高承托力，亦保護到駕駛者有十足安全，坐上車，會覺得自己坐緊一張流動名貴梳化，咁當然，其4.2公升V8引擎也不賴，低轉高速扭力充沛，高轉速度亦好。論品味，除主車顏色可供選擇外，其他如座位縫線位、車內櫳顏色都可自選，Unique，就係要每位車主都擁有獨一無二嘅瑪莎拉蒂，行出街，搶收視，贏虛榮。
咆哮先聲奪人
瑪莎拉蒂有今日江湖地位，細緻造工同對專業嘅一份執着功不可沒，懶理市場如何大眾化，始終我有我性格，歐洲人呢種先天氣質就係咁執着，一味要豪，一味要有品味。2008年樂壇新人Gem（鄧紫棋）都一樣執着，剛考完會考嘅佢，13歲開始寫歌，堅持曲、詞、彈、唱一手包辦，音樂天份高，理想方向定得遠，佢話：「我對自己音樂定下目標，音樂係終生職業，我唔係玩玩吓。」比年齡相若只懂吃喝玩樂、無明天無理想嘅同輩相比，Gem明顯成熟得多。
Gem今年16歲，未夠秤考車牌，但渴望擁有自己座駕：「我一定考車牌，唔使下下搭的士。」心水車款？唔使諗，佢指一指身邊部瑪莎拉蒂話：「GT，或者林寶都OK。」咁鍾意辣車？「係，把聲好好聽，我好想買到部GT。GT唔係得個樣，四出式尾喉響到爆，頭先坐喺車入面又唔覺嘈，嚇到街外人，又唔會嘈親自己，好型；就連車徽個三叉戟標誌，都一樣咁型。」
MaseratiGranTurismo規格
引擎：4,244cc，V8
馬力：405hp/7,100rpm
扭力：460Nm/4,750rpm
傳動：ZF6前速半自動波配F1撥片
車價：$1,538,000
查詢：快意汽車（35210183）
