今年香港電腦通訊節又大破紀錄，52萬入場人次，市況真係咁掂，腦場Sales就唔使喊晒口嗌生意難做啦！好多廠牌同腦場咁貴租都要霸番個位，除咗谷當期熱賣產品，大多都係清舊貨性質，骨精龍老友C就喺第二日入場使咗成四千蚊，有芒、機頂盒同DVD-R，數落好似幾抵，但我同佢上網格番價，發現型號舊不特止，加埋仲要貴成10%，當然未計過海車錢同入場費！骨精龍就有招冷靜買嘢心法，就係每當有畀錢衝動時，先問吓自己：「若果平時喺高登見到，會唔會買先？」若果會，即證明你真係有需要，否則就代表你畀外圍客觀因素影響咗，為買而買。
有腦場Friend就私底下同我講過，每年都係等呢日搵錢，而且啲人畀得$20入去，就預咗掃貨，購買氣氛勁過腦場多多聲，拎一、兩件出嚟劈就夠，最緊要有靚女Promoter，企一日唔使一千蚊，但各大傳媒、Forum都有曝光機會，增加氣氛又有宣傳價值，抵晒。